Fundman睇市：香港寬頻穩陣之選

復市港股表現比預期更差，與前晚美股先升後回不無關係，聯儲局主席耶倫出席半年一度的國會聽證會，再重申美國經濟平穩，畀聯儲局維持「循序漸進」加息的步伐，不過佢不忘補飛，加息還是取決於經濟數據，等大家估估吓，總之要維持市場加息預期。

華爾街股市的先揚後挫，反映外圍經濟動盪，尤以中國的不明朗因素升溫下，博暫緩加息的鴿派捧場客，唔滿意加入掟貨。但話說回頭，耶倫雖然口硬，前晚十年美國國債息率插到落1.71厘，創超過一年新低，債商的舉動，預示上半年美國加息機會已愈來愈渺茫。

悲觀情緒佔主導

港股繼續改寫三年半新低紀錄，悲觀情緒主導股市，何時見底已完全取決於投資者信心何時達到最恐慌一刻，避險情緒高漲下，全日逾200隻股票創五十二周低，沽空佔大市成交比例15.6%，滿以為幾隻A股ETF會有人賭A股復市追跌，沽空增加，但意外地沽空得最勁反而係大笨象滙控（00005）同騰訊（00700），安碩A50（02823）等大熱門反而沽空榜五甲不入。

零息下通脹以及增長都未達標，唔通開始加息後會仲好啲？所以史提芬老早批死美國今年要加四次息，根本係天方夜譚，只不過，估佢唔到嘅係，即使長期利率回落，息口敏感股一樣唔掂，尋日藍籌只得信置（00083）及新世界（00017）逆市做好，不過在中國硬着陸的故事底下，大孖沙都唔理三七廿一，紛紛要錢唔要貨，近幾周只得兩電一煤算係頂得吓。

買兩電，怕政治化社會環境令未來利潤管制協議有意想不到結果出現；至於兩隻流動電訊股，又因為新一代iPhone銷情麻麻，短期業績難免要跌；買REITs咩，又唔係隻隻揀得落手，部分會受本地商舖租金見頂影響。當然心水股，主攻屋苑商場的置富（00778）相信影響比較細，仲係諗得過。

如果上述收息股，都睇唔上眼的話，仲有一隻比較冷門的選擇，是手握本地住宅寬頻市場半壁江山的香港寬頻（01310），一二年殺價超人成檔賣畀美國私募基金CVC後，舊年三月上市，由於得退休基金捧場，相信今年將提高派息以滿足這批長線股東的需求，估計可以去到每年自由現金流的八至九成，現價計落一六年股息近5厘。本地寬頻市場，基本已建構一個寡頭壟斷格局，減價戰爆發機會唔大，對唔想冒險，只求收息回報過吓日辰的股民來說，可以諗吓。

金礦股成避風港

尋日成個市仲見得吓人嘅，只得幾隻受惠金價反彈的金礦股。由於市場避險情緒升溫，資金持續流入金市，金價昨日在亞洲時段急升逾1%，突破1,200美元大關，創近九個月新高。美銀美林話美元升值減慢以及暫緩加息，都有利金價，今年國際金價每升1%，估計紫金礦業（02899）盈利會有2.4%增長，建議買入睇2.6元，尋日股價升8.1%，收2.13元。

世界黃金協會發布二○一五年《黃金需求趨勢報告》顯示，去年黃金需求4,212公噸，較一四年輕微下降14公噸，但其中第四季度黃金需求同比上漲4%至1,117公噸，反映市場對黃金的需求有回升趨勢。另一方面，報告又指一五年黃金產量按年減少4%至4,258公噸，為○九年以來最低，預期在開採企業削減成本措拖之下，產量有機會進一步減少，對金價有利。