股海實戰：中糧圓底回升格

睇番羊年最後一個交易日，恒指高開104點後在窄幅水平上落，全日上下波幅只有167點，埋單升105點，收報19,288點，意頭不俗，至於國企指數則升80點，收報8,054點，但全日成交金額只有554億元，長假期前夕，都預咗個市會靜。

大市交投續淡靜

由於今個禮拜只有兩個交易日，相信在節日氣氛仍然濃厚下，大市交投應該不太活躍，何況內地股市仍然休市，加上大市成交不大，真係任得班大戶點舞都得。

農曆假期前，恒發洋參（00911）趕得切復牌，而股價一如預期大幅波動，一度升過上0.118元，較停牌前升247%，但之後由高位回落，最後以0.069元收市，全日升102%，假如高位追入的話，真係喊都無謂。阿莊覺得玩得呢啲股真係要食得鹹魚抵得渴，事關股價大上大落，閃身唔夠快隨時出事，唔係坐定定對住個報價機炒的話，真係咪掂。

雖然羊年最後一個交易日大市升，但係都有成五百幾隻股份下跌，事實上，呢排好多時都出現升市唔升股的情況，似係大戶借重磅股將指數舞高弄低，市場氣氛仍然麻麻，搵食艱難，投資者入市意欲低，希望過埋年大市整體氣氛會好番。

三月將會踏入業績公布期，若然大市再無焦點，阿莊覺得不妨趁個市仲係靜靜哋，做定功課，搵定啲績優股睇吓有無得炒吓。

中糧控股（00606）假期前做好，股價升3.36%，以2.15元收市。中糧由去年六月高位5.1元，反覆跌至2元水平，橫行半個多月後，假期前現突破，並進一步升穿20日線水平，走勢明顯轉強。

由於內地經濟下行壓力未減，企業盈利前景欠樂觀，中央希望藉改革可提高效益，目前，國企重組改革正進行得如火如荼，而中糧系重組消息一直甚囂塵上，一旦落實，相信可成為刺激股價上升的催化劑。

目標上望2.5元

中糧截至六月底止的中期業績，虧損由一四年同期的2.9億元收窄至2.69億元，表現有所好轉。近日股價跌至2元水平明顯現承接，並呈圓底回升格局，估計再大幅下跌風險不大，不妨買入，目標2.5元，若跌穿2元關則止蝕。