港股經上周五上揚後，尋日升勢無以為繼，恒指高開87點後，由於內地官方一月製造業PMI由49.7降至49.4，創近三年半低位，並遜於預期，故拖累恒指掉頭向下，最多跌238點，惟尾市跌幅收窄，埋單跌87點，收報19,595點，國企指數則跌96點，收報8,144點，全日成交縮減至只有694億元，交投淡靜。

工程機械市場不振，但相關因素已在中聯重科股價上反映。（資料圖片）

除PMI遜預期外，非製造業活動指數亦回落至53.5，加上人民幣中間價七天來首度下調，令A股未能延續周五反彈勢頭，滬綜指再度跌穿2,700點關口，收報2,688點，跌48點，深成指則跌96點，收報9,322點。

春節長假前料淡靜

事實上，港股明顯受制於20日線19,646點，升又無力升，跌又跌唔落咁款，明顯缺乏方向，下個禮拜就放農曆新年假，睇怕港股交投都會日趨淡靜，但係阿莊覺得家陣做淡似乎無乜着數，都係觀望為上，睇定啲再作部署。

市場缺乏炒作焦點，而近日細價股連番出事亦嚇怕咗投資者，大大打擊入市意欲，其實唔止細價股，大價股亦同樣嚇人，好似汽車股近排係咁俾人「車」，隻長汽（02333）連日創新低，昨日再創5.48元一年低位，埋單收報5.51元，跌6.7%，吉汽（00175）、華晨（01114）及北京汽車（01958），均跌逾7%。

水務股尋日獲德銀唱好，指現時為買入良機，並首選北控水務（00371），刺激其股價昨日反彈6.7%，至於光大國際（00257）亦升2.3%。不過，水務股尋日反彈，成交未見配合，所以阿莊覺得現階段毋須急於跟進，情願睇定啲再作打算。

中聯重科（01157）上周五發盈警，料截至去年底止全年純利按年下跌八至九成，主要由於人民幣兌美元等外幣中間價大幅波動，加上受國家固定資產投資、尤其是房地產投資增速持續放緩的影響，工程機械產品市場需求持續不振，為控制風險，公司繼續實施從緊的銷售政策，對營業收入和淨利潤產生一定影響。

不過，中聯重科昨日不跌反升，在成交增加配合下升8.9%，以2.2元收市，可能是市場憧憬公司最壞時期已過，加上股價累跌已多，故趁勢作出反彈，料短期勢頭可持續，短期阻力為20日線2.35元。