今年首月，內地滬綜指跌幅超過兩成，悲觀講剩餘的十一個月仲有排捱！樂觀講是年初大幅調整過後比較基數降低，未來有望逐步回穩。國際金融巨鱷話睇死中國經濟硬着陸兼落重注做空，但相信祖國唔怕子彈，更不怕銀彈。反正如今市場尚未完全開放，一招資金管制、再管制，巨鱷亦難動身。

A股精要

上海市市長表示，戰略新興板即將推出，很多企業表示要首批掛牌，說明資本市場波動，投資者對創新企業投資更感興趣，反正傳統產業沒什麼好投資，能否成為跌市中的樂土，且拭目以待。

上周四、五先後有二、三線股急挫，令人關注市況持續疲弱，部分莊家股支持唔住爆煲。就連有大品牌作靠山的，都難敵淡風，阿里健康（00241）上周股價跌至3.3元，去年呢隻股最高做過14.32元，高位唔走真係揼心！總之，投資者唔好一味靠坐，亦要客觀分析技術走勢，一見大位失守，就嚴格執行風險管理，別做盲俠！

氣氛改善現生機

難得霉氣充斥的一月已成過去，本周四就係立春，期望春回大地，重現生機！在三月聯儲局會議及季結前，二月大市筆者認為睇上機會大過睇落，但睇上幅度唔太多，只是氣氛會較一月份改善。新春期間A股在低位徘徊打底，照計估值低殘的金融股有得諗。

光大控股（00165）上周五便率先反彈逾6%，收報16元，成交1.06億元。去年七月A股股災，光控股價一度低見12.6元，去年末季的反彈上過20元關，是浪反彈若能重上50日線17元關，則有機會再試18至20元阻力區。但若然掉頭再失14元關，不用等試去年七月低位，就要先行止蝕離場。