上期講完實習，今期就講搵工最後一關─面試。擁有GPA過三爆四的成績，豐富的實習經驗，無理由因為埋門一腳面試撻Q而斷送機會。成日聽人講面試要做足準備，但實際金融業面試時會問啲咩？點樣先可以在考官面前拎滿分？兩位大學生率先體驗分析員「Mock Interview」，話你知真正金融界點見工！

時富姚浩然（中）認為，Stephen（左）及Emily（右）面試表現理想。

是次模擬面試是以一位考官對兩位考生進行。

今輪面試問啲乜？

大學三年級生Stephen及Emily分別修讀港大會計及財務學系，以及理大應用數學投資科學系，擁有金融機構實習或協助教授研究股市走勢的經驗，對投身金融界有莫大興趣。今次，他們與時富金融資產管理部董事總經理姚浩然進行模擬面試，感受一下見工實況。

三大準則評考生

模擬面試以一位考官對兩位考生形式進行，姚浩然指，平時則以一對一為主。他向兩位同學提出不同問題，從三大因素考慮是否聘請考生，包括個人分析能力、市場觸覺及對工作前景看法。

姚浩然首先問Stephen及Emily為甚麼有興趣投身金融業，兩位考生分享實習及兼職經驗，顯示出他們對投身金融界的熱誠。姚浩然續問他們的投資經驗、推薦股份及對中港股市看法，從中了解同學們的市場觸覺。

兩位同學回應中港股市的看法時，從內地股市去槓桿化、中國經濟下行壓力、熔斷機制、美國加息等因素討論對市場的影響，當中提及不少數據和例子，反映他們緊貼市場消息，顯然做足功課。

姚浩然再問及，「一旦人民幣貶值速度快過預期，你覺得對股市有咩影響，點解？」他指，目的是了解同學們的分析能力，是否對市場有獨立的見解。

團隊交流睇合作

他亦希望知道兩位同學對工作前景的看法，「曾經有考生對工作前景無意見，淨係話你請我就得，又唔考慮進修，唔清楚自己想點嘅人通常都唔請。」

Stephen表示，「我知道公司有見習生計劃，安排同事輪流喺唔同部門工作。我想先了解唔同部門嘅工作架構，再到投資銀行部門發展。」Emily則指，期望可在股市研究方面鑽研。

最後，姚浩然稱，正式面試會再安排考生與工作團隊見面和交流，伺機留意考生的團隊合作性。「其他同事會問一啲個人興趣問題，目的係睇吓大家夾唔夾得嚟。最後，會投票決定請邊個考生。」

總結今次模擬面試，姚浩然認為兩位考生表現理想，做足準備兼清楚工作目標。他指，「考生有無金融相關牌照唔重要，面試時係睇吓考生有無事先了解公司背景，熟悉市場走勢。最好係可將市場資訊消化，加以分析，得出個人看法，呢部分係最難但亦最易加分。」