舊年受司法覆核問題困擾被迫押後截標嘅大埔荔枝山山塘路住宅地，將會喺今個禮拜五截標，不過最近市況差咗咁多，加上又有地皮喺上個星期流標收場，所以劉Sir班測量師老友都唔多睇好今次競投反應，有老友就大幅削減地皮估值約15.6%至43.8億元，比原先估算少咗超過8億元，更認為地皮有一定流標風險。至於港鐵（00066）將軍澳日出康城第十期就會喺明日截收發展意向。

市場人士認為，山塘路地皮位置較「吊腳」，而且高限分兩部分，令設計上分層住宅同洋房分布較困難。（資料圖片）

日出康城第十期（箭嘴示）於明日截收意向。

本周截意向及截標的住宅項目

項目規模大 周五截標

劉Sir知道，呢幅大埔荔枝山山塘路住宅地，佔地超過40萬方呎，提供約莫115.3萬方呎樓面，呢幅地原定喺舊年十一月截標，但係就受到環保團體入稟申請臨時禁制令禁止批出標書，最後地政總署就決定將地皮押後到今個禮拜五先截標，畀發展商有更多時間考慮投標。

市場就覺得今次都有流標風險，老友理想城市張聖典同劉Sir講，呢幅山塘路地皮規模大，對發展商嚟講係比較「難食」，位置都幾吊腳，而地盤高限分開兩部分，令設計上分層住宅同洋房嘅分布比較困難，加上市場氣氛轉變，上個禮拜又有住宅地皮流標收場，所以由原先估計每方呎樓面地價大約4,500元，調減至約3,800元，即係下調咗估值約8.1億元，去到43.8億元，係市場下限。

張聖典仲話，呢幅地皮投資額唔係小數目，發展商未必會冒險進取出價，佢覺得地皮都有一定流標風險。至於老友高力國際張翹楚亦相信，發展商投地風險比起之前增加咗唔少，若果可以如期批出，每方呎樓面地價有機會少過4,000元。

康城10期明日截意向

至於將軍澳日出康城第十期就會喺明日截收意向書，劉Sir知道，地盤位於日出康城項目嘅臨海轉角位，將來享有最寬闊海景，總樓面約莫81.2萬方呎，提供兩幢分層住宅，單位唔超過1,170伙，預期二○二二年落成。

市場估計補價約17.9億至24.3億元，每方呎補價約莫2,200至3,000元，有望成為日出康城最高呎價嘅純住宅期數。