尋日期指結算，全日大市表現牛皮，直至尾段才發力，恒指最後升143點，收報19,195點，成功收復10日線水平，國企指數則升69點，收報8,028點，全日成交金額754億元，大市尋日雖然升，但係成交未能配合，而且睇番統計數據，主板全日下跌股份758隻，仲多過升的595隻，反映升勢並不全面，不排除大戶抽高重磅股挾高指數結算。

鐵建裝備於內地鐵路大型養路機械市場，具有領導地位。（資料圖片）

藍籌股方面，尋日以濠賭股表現最突出，但根據過往經驗，次次佢哋升完個市都冇運行，而且內地股市尋日表現持續偏軟，滬綜指昨日再度失守2,700點關，收報2,655點，全日跌79點，深成指亦跌339點，收報9,082點。

由於內地股市下行壓力未減，相信A股有機會進一步尋底，料港股亦會受到拖累。

斬倉潮恐陸續有來

尋日有158隻股份創五十二周新低，好多基本因素良好的股份，亦難敵大市下跌，普遍走勢呈一浪低於一浪，至於細價股更慘不忍睹，好多舊年成功脫離仙班的股份，已經一早打回原形，重回仙班之列。

尋日隻恒發洋參（00911）股價急插逾九成，由三毫幾跌到只有3仙幾，最後仲停埋牌。

恒發洋參股價急跌，估計涉及股份斬倉，大市氣氛好時，股價無事無幹當然無事發生，但係近排大市急挫，股份一旦跌穿斬倉價，債主當然會將抵押的股份拋售，造成股價急挫，若然大市無起色的話，相信類似事件將陸續有來，投資者真係要打醒十二分精神。

尋日基建股表現不俗，由中鐵建（01186）分拆出來的鐵建裝備（01786），升逾2%，以3.05元收市。集團主要從事製造及銷售鐵路維修保養機械鐵建裝備，截至一四年十二月底止，集團已於中國出售約2,200台鐵路大型養路機械，佔中國所售鐵路大型養路機械總數約81.5%，具市場領導地位。

作為高新裝備公司，集團一直在創新研發不遺餘力，同時有意走向世界，並會考慮對海外公司進行併購及其他國際企業合作，相信此舉有助進一步提升技術水平，同時亦助開拓海外市場。

鐵建裝備去年十二月上市以來，大市表現疲弱，其股價亦反覆走低，周二更一度跌至2.94元上市新低，較招股價5.25元跌逾四成，由於累跌已多，加上股價在3元以下水平現承接，不妨小敲，初步阻力見於10日線3.26元。