Fundman睇市：炒政策不宜信十足

加唔到息，顯示美國經濟復甦並非如市場想像般強，周三晚美股三大指數插水，不過美息上調步伐可能放慢，對亞洲新興市場則是難得的喘息機會，A股與日股除外，尋日亞太股市普遍都有進帳，港股亦無跟美股走，期指結算日恒指高開41點後表現反覆，最多升過171點，埋單升143點，收19,195點，成交唔搶眼，得754億。

巨熊出沒已接近三季，唔少二三線早就跌到殘，惟獨今浪罕見的二三線斬倉潮，居然在尋日升市下，由恒發洋參（00911）揭開序幕，股價一開就瀉，十點半拉閘前累跌91%或者0.361元，得番0.034元，缸邊傳言四起，但確實原因有待公司通告。

股仔恐現斬倉潮

咁啱筆者上周與一班中資行大班飯敍，講起有唔少中資客，舊年港股大時代期間落嚟炒股，雖則股票行方面都跟足規矩，按得極低成數，但個市陰陰乾大半年，唔少二三線高位唔見七至八成，已去到孖展客蝕入肉的邊緣，證券行唔推部狗頭閘出嚟，純粹只係響應國家隊維穩呼籲，不過見恒發洋參尋日個勢，加埋老友們言之鑿鑿，短期即使要想博反彈撈貨，都係揀返啲成交夠大的球場去博，靜得緊要、一日得三、兩球錢成交的股仔，都係免得過就免。

到底係因為期指結算，純托指數，抑或係股仔暴瀉的影響？即使升市，尋日下跌股份超過八百隻，比上升股份大約六百隻要多，尋日史提芬揀隻太保（02601）升2.9%，跑贏國壽（02628）、平保（02318）及新華保險（01336），順利破10日線，按技術走勢，短線可先睇28.3元。

早排講過，在去庫存去產能的大趨勢下，即使反彈，可以唔使睇舊經濟股，疊埋心水專攻TMT等新經濟故事，其中醫療保健類股票，本來應列入中國經濟新希望，不過政策風險實在難料，最佳例子就如尋日隻阿里健康（00241），狂插兩成，公司照例話不明跌因。

內地媒體報道，因為內地藥廠唔滿意國家「全國藥品電子監管網」被壟斷，準備向相關部門及阿里健康興訟，報道指國家食藥監總局副局長孫咸澤，與藥廠開會後曾揚言收回阿里健康的藥品電子監管系統營運權，由於會面非公開，難辨消息真假。

不過睇阿里健康股價，同舊年港股大時代高峰14.32元相比，跌到零頭都唔夠，以舊年十一月反彈高位6.6元計，亦都做緊五折大酬賓，得番3.34元。若然上述傳言屬實，財雄勢大如阿里，搞網上藥店都會有如此遭遇，仲講乜「互聯網+」又或者以電子商貿帶動舊經濟？今次故事教訓，炒內地政策，信十足隨時輸死人。

基建股只宜短炒

在一帶一路概念下，基建股去年一度是投資者的寵兒，但隨着大市回落，相關股價亦屢創新低，中國中鐵（00390）及中鐵建（01186）較一年高位已回落超過六成，跌幅相當驚人。

由於內地經濟依然疲弱，相信增加基建投資仍會是中央刺激經濟的重要政策，據悉鐵路「十三五」規劃期間，全國新建鐵路不低於2.3萬公里，總投資不低於2.8萬億元人民幣。近日基建鐵路股見由低位作出反彈，昨日升幅更加顯著，其中以中鐵表現最突出，全日升6.83%，至於中鐵建亦升5.2%，中交建（01800）升2.6%。

不過，雖然鐵路工程項目眾多，但市場關注毛利率，加上負債高企，亦增添基建股的不明朗因素，所以即使反彈，相信升勢亦難以持久，故只宜短線投機買入。