滬綜指失守2,700點收市，浸浸落猶如無底深潭！官方話嚟緊經濟係「L」型走勢，但到底現時離那個「L」底有多遠，先至係投資者最關心的問題。睇今年一月開個頭差成咁，首季經濟數據睇怕都會幾驚嚇！股市通常走先經濟六個月，眼前跌市正反映悲觀的經濟前景。

A股精要

近期魚缸熱門話題不外乎係國際金融大鱷已屯重兵做空中、港股、匯，成班大鱷虎視眈眈中國已好幾年，終於等到出手機會。不過，呢個行徑無異於挑戰當今中國政權，成功的概率唔高；如果成功，唔單只中國，睇怕全世界都唔會有好日子過！

雖則國家主席習近平話，中國呢場新革命係「開弓沒有回頭箭」，但筆者認為，若然金融危機足以影響到社會穩定，中國應考慮放慢人民幣國際化步伐，先穩定內部環境，以換取時間推展內部經濟結構改革，打好基礎再上路，這既可免令大鱷得逞，亦沒有放棄改革的初衷。

細價股成糟質對象

近月陸續有二、三線股宣布合股供股，昨日更見到有股仔股價急挫而停牌，顯見今次跌市進入另一階段。事實上，預期淡市要維持一段時間的話，無論係實力紅色莊家，抑或係本地老牌莊家，都唔會做善事力頂股價，反而是踩多腳又或者供供合合將貨源回收。炒得細價股，就預咗食得鹹魚抵得渴！

大價基金股亦唔好得幾多，好似安踏體育（02020），去年股價大幅跑贏大市及同業，皆因隻股夠乾身，基金成功圍飛。不過踏入新一年，基金組合洗牌，沽高估值股份套現吸優質平貨係正路做法。安踏股價在去年末季高見24.45元後，終於不敵地心吸力，前日一度低見16.22元，昨日反彈上18.04元。

若今轉反彈未能收復250日線18.58元，相信股價繼續下試低位的機會甚大。有貨宜趁反彈減磅，冇貨亦無謂手多。若掉頭再插穿16元的話，等見番去年初13元水平先至再諗都未遲！