大市連續第二日反彈，恒指昨日一度升逾400點，高見19,490點，並一度收復10日線19,370點水平，惟收市未能企穩，最後僅以19,340點收，全日升259點，至於國企指數則報8,173點，升68點，全日成交金額744億元，較上周五減少，大市升成交減少，動力不明顯不足，不排除淡友隨時藉壞消息插返轉頭，所以如果呢兩日有入市撈底博反彈，無論升多升少，都宜先行沽貨獲利，萬一個市逆轉，由贏變輸就無謂。

內地積極推進「互聯網+」，利好軟件行業。（資料圖片）

石油股後市未明朗

內地股市跟港股一樣，在成交減少下繼續上升，滬綜指收市報2,938點，升21點，深成指則升80點，收報10,192點。在油價持續反彈下，石油股延續上周五的上升勢頭，當中以中海油（00883）表現最突出，全日升4.75%，至於中石化（00386）及中石油（00857）分別升3%及2.8%。雖然，石油股近日走勢對辦，但升勢能否持續，則視乎油價走勢，所以跟炒石油股，都要金精火眼睇住油價。

停牌超過十個月的桑德國際（00967），昨日終於復牌，但股價卻急瀉，並一度低見2.35元，收市雖略為反彈，但全日仍然要跌62.14%。桑德停咗牌咁耐，而期間個市跌咗咁多，所以復牌急挫亦不足為奇。

其實，港股係威係勢咁彈咗兩日，能否繼續反彈除咗睇外圍之外，最重要都係睇港匯，因為早排個市急插，都係港匯作怪，假如港匯再走軟，市場再次掀起走資憂慮的話，個市都好難有運行。至於尋日升市之下，主板跌的股票有417隻，較上周五有所增加，至於升的股票亦得返906隻，所以現階段都係審慎為上。

擎天軟件（01297）昨日股價升4.76%以3.52元收市，截至六月底止的中期業績，錄得純利5,675萬元人民幣，按年升23%。目前，內地正積極推進信息化發展的政策，包括「互聯網+」行動計劃，鼓勵大數據及雲計算等發展，以配合整體經濟結構轉型，為擎天提供良好發展機會，而集團積極加大各主要業務領域的投入、為盈利增長增添動力。

另外，港交所（00388）資料顯示，富達於上周一即一月十八日，在市場增持公司股份，每股平均價3.42元，既然機構投資者亦趁低增持，證明對公司發展前景的認同，近日擎天在低位回升，不妨3.5元或以下水平買入，初步目標4元。