Fundman睇市：地產股人棄我取

前晚外電報道，久聞樓梯響的巴克萊新一輪裁員，即將殺到埋身，唔單止把亞洲成檔投行生意關掉，受影響的仲包括紐約、倫敦，甚至要削減及延發花紅。早兩星期經已有路邊社消息話，巴記本地證券部門本月中打後所有非交易路演，通通叫停，已聞到些少魷魚味，睇嚟消息無十足都中九成。

又一間曾雄心壯志，睇好大中華故事，響香港大展拳腳的投行講拜拜，確實唏噓，面對全球經濟低迷，歐美國家不時向銀行業開刀罰錢，生意僧多粥少的投資銀行，確實唔係好多股民想像般咁好環境。

基金要錢唔要貨

話說回頭，尋日有歐資私人銀行響香港開投資研討講座，呢類私人銀行客戶，講緊入場費至少都三球美金，居然有數千人出席賓墟咁場面，只能話，香港疊水之士的確何奇之多。私人財富管理市場好可能會係整個金融板塊中，最後一片樂土。講開又講，講座咁旺場，多少亦同近半年市況動盪，股、匯、樓、債樣樣得番半條人命，有銀人士都想發掘一些一六年投資idea有關。

一月中，美銀美林一項環球基金經理調查顯示，受業績預測下滑及增長前景放緩所困擾，大孖沙手頭現金比例升至5.4%，是○九年以來第三高水平。芬佬投資第一條格言是「不明朗揸現金」，高現金比例，揭示個個要錢唔要貨的事實，但也往往是市況即將見底先兆。

可惜另一個寒暑表，目前僅12%芬佬預視未來一年環球會陷入衰退，同上次金融海嘯引發環球股災時去到五成幾相比，仲有好一段距離。當然，調查訪問的是環球資產管理團隊，中港股市的跌浪比外圍更早發生，或者，我哋好大機會亦會比外圍早見到今浪的浪底。假如用股市市盈率與市帳率一類傳統方式去評估，不到萬九點的港股應該離底唔遠，唔少人包括在下，都等緊終極的恐慌跌市出現。

新經濟股未跌夠

更多看官會問，邊一類股票可以撈底時優先考慮？老實講，熊市之中一定唔賤唔買，可惜最賤最殘的，都是中國產業轉型、服務業逐步取代製造業的趨勢下，佔經濟重要性愈來愈低的犧牲者，好似資源、重工業、金屬企業一類。反之互聯網、電訊、電子商貿等一類前景比較好的，就明顯未夠殘。

今浪國指從高峰掟咗近半落嚟，但騰訊（00700）由大時代高位170元，只係跌咗兩成二，美國上市的京東（JD）都只係跌到三成，話殘未算十分殘，係可買，但又唔係可以一注獨贏，買落去安枕無憂果隻。

反而係，今浪炒家借港匯沽低大市，講到尾，今日港府外匯儲備，與九七年不可同日而語，炒脫勾最終都會無功而還，班空軍借拆息一招狂隊本地地產股，昨日恒地（00012）、新地（00016）、新世界（00017）及信置（00083）等均創出一年新低。但睇番近年大地產商的新樓落成收入比重，正逐漸被更穩定的投資物業租金收入所取替，其高股息有一定保障，實為人棄我取之選。