Fundman睇市：資源股跟炒易中伏

縱觀近日內地經濟數據，好似早兩日的製造業PMI肉酸都暈，人民幣愈跌愈急，而且見離岸與在岸價差距愈行愈遠，資金外逃的情況似在加劇，橫睇掂睇，中資企業除了估值夠平外，實在搵唔到第二個賣點。對buy side基金經理而言，錢是客戶的，買唔買關鍵係有無故事配套，解釋到點解要買，好可惜，單是「平」從來都無說服力，業績唔得再跌多一、兩年的話，今日的低PE股，一年後隨時變成高PE股，整體大市幾時見底？真係要睇中國經濟轉角位幾時先至出現。

iPhone概念股捱沽

北韓餓住肚都要試玩氫彈，亞洲股市死多二錢重，藍籌得六隻股票逆市向好，電能（00006）及領展（00823）兩隻息魔至愛榜上有名。近日中國股市震盪，已禍延全球股市出現難睇的開局，加埋北韓核試，地緣政治不穩因素增加，今年美國聯儲局係咪咁容易加到四次合共1厘息，值得商榷。聽晚美國出就業數據，新增非農業職位估緊20萬個，達標的話，估計對股市影響有限，反而可以博吓數據低於預期，令資金回流股市的可能性。

有傳蘋果公司向供應商削減首季iPhone產量訂單三成，相關零部件及代工股昨捱沽，瑞聲科技（02018）跌5.1%，高偉電子（01415）及富智康（02038）亦分別跌逾1%。查實Apple Watch銷情頭威頭勢，之後無以為繼，iPhone6s的小修小改版本，導致換機率不及分析員估計，蘋果公司股價去年中在132美元水平見頂，輾轉已經碌到落102美元，高位計就快唔見四分之一。

美國科技界一些爆料網站已經講緊，蘋果公司可能唔跟以往六月公布、九月見街的傳統，可能提早推出新一代iPhone挽救銷情。話時話，計一六年PE，蘋果公司比瑞聲仲要低，講緊分別係16.5及11倍，過多一兩個月見蘋果公司隊得再深啲啲，小弟都心思思諗緊撈底。

唔使等十八年，上次私有化失敗十八個月之後，新世界發展（00017）捲土重來，向新世界中國（00917）提私有化，出價比停牌前溢價25.6%，每股7.8元，涉及金額約214億元，昨日新中股價升20.6%收7.49元，得4.1%套利空間。

新世界精打細算

新世界本身股價有近六、七成資產折讓，卻以較去年六月底新中每股資產淨值6.995元高出11.5%的出價提私有化，表面睇無乜着數，但睇番個幾月以來，新中向恒大（03333）賣資產套現155億人仔（部分代價是永續債券），真正所花的有限，再者回本期較長項目經已套現，趁機平平地收番帳面上極便宜的土儲，試問又點會計錯數！

近日A股市場的鋼鐵股回勇，連帶煤炭股及其他金屬股亦受追捧，本港H股也跟隨升勢。資源股鹹魚翻生主要借力於政府的「供給側改革」，期望去產能將可切實執行，李克強連日到鋼廠和煤礦視察似為顯決心；不過，同時有報道指9省今年重點項目投資，內地政策經常搖擺不定，去產能隨時讓路給穩增長。

內地鋼鐵價賤過白菜價已非新聞，奇在產能仍年年增加，淘汰落後產能只是空話。鋼廠的熔爐一開就不能停，所以產能不能話減就減，地方政府亦不願區內鋼廠停產，影響GDP及就業。今次供給側改革三令五申，究竟可以去到幾盡要拭目以待。然而，即使供給端有改善，中國經濟下行壓力將進一步影響需求，是否足以相抵還未可知，現時即大炒特炒有反智味道。

中鋼協公布，十二月中旬重點鋼企粗鋼日均產量連續六個旬度下降；而十二月份鋼鐵行業PMI為40.6，按月回升3.6，雖脫離七年新低，但距離50榮枯分界線仍遠；新訂單指數大升11.2至40.9，顯示需求端有改善。數據為鋼鐵股升勢護航，但資源類若盼達至供需平衡料需一段時日，現時市場周街平貨，跟風炒作隨時中招。