盛傳國家隊前日入市，內地A股昨日回升，滬綜指反彈逾2%，但港股無動於衷，恒指跌207點收場，失守21,000點關。顯然，元月股市開門黑，股民初嘗A股熔斷機制威力，再加埋北韓又再搞搞震，真係屋漏兼逢連夜雨！

A股精要

執筆時傳來離岸人民幣創新匯改以來最大跌幅，高盛話近日中國政府表現出引導人民幣貶值的強烈意圖。

人仔貶值，乃中概股估值壓測的另一考驗，短期繼續捱打。官媒引述權威人士定調「L型增長」，又指資本市場有「先破後立」的可能性，咁係咪即係要將A股推倒重來？

但有一點可以肯定，今屆政府決心正視結構性問題，甘願犧牲一點經濟增長，換取更長遠更健康的發展。認清形勢，大概眼前的市況波動，並非世界末日，今年股市仍充滿機會，多了解國情，耐心等候出擊時機。

阿爺多番強調今年要搞好供給側改革，昨見煤炭股逆市做好，中國神華（01088）、兗煤（01171）及中煤能源（01898）升4至6%；鞍鋼（00347）、重鋼（01053）及馬鋼（00323）升4至7%，但睇成交仲係唔多像樣，提防「死貓彈」！

科網股借勢炒上

板塊方面，雖然跌市，但適逢美國消費性電子展開幕，多隻科網股乘機炒上，其中IGG（00799）股價逆市升6%、網龍（00777）升3%、博雅互動（00434）升4%。不過，論升幅最勁都係天鴿互動（01980），股價急升15%至3.81元收市，成交有八千多萬元。

天鴿主要從事經營實時社交視頻平台、手機及網絡遊戲等業務，去年首三季度虧轉盈，賺1.44億元人民幣，若撇除前年同期的可轉換可贖回優先股公平值虧損2.83億元，盈利穩定增長。以一隻處於高增長行業的股份而言，去年度業績不受特殊項目影響下轉虧為盈，應該能夠吸引投資者眼球。

走勢上，去年初由高位7.72元跌至七月低位僅2.28元，隨後反彈受制於4.3元水平，今轉升勢將再次挑戰該阻力位，特別今年新三板將非常熱鬧，呢類新興產業股，有機會再成市場焦點。