上星期市場無乜大消息，睇怕年頭都係穩陣一點，揀選有實力的板塊。好似油價持續在低位徘徊，三桶油無運行，就連油服股亦被抽後腳，彈都唔彈吓，這類板塊真係諗都唔好諗。

相反，從長線國家規劃，以至上星期中電新能源（00735）宣布與大股東國家電力投資（國電投）簽訂諒解備忘錄，由國電投附屬公司的國家核電向其注入全部核電資產及業務，可見潔淨能源行業從國策前景及消息面上均具炒作概念，值得從中尋寶。

睇番行業個股表現，近期金風科技（02208）股價最有勢，而中廣核電力（01816）亦有見底反彈迹象。但筆者就較鍾情於順風清潔能源（01165），貪其以往主力發展太陽能業務，早前亦投資了一間從事儲電池管理技術的公司，隨時可炒新能源汽車概念外。另去年十一月又與中廣核歐洲訂立戰略合作協議，雙方同意在光伏、儲能、低碳節能、能源管理及高新技術等領域合作。

查實中廣核歐洲是中國廣核集團的全資附屬，而中廣核集團則為國資委監管的中央企業，這就隨時造就多一個強強合作的炒作概念，一旦資金睇中，真係唔怕無消息炒。

現價離底不遠

走勢上，順風潔能自去年七月開始，主要在1.8至3元水平上落，但睇番去年四月高位為7.39元，如果高位買入唔止蝕又持貨至今，都咪話唔傷。只是以近幾個月股價穩守1.8元，再睇埋往績市盈率僅約3倍看來，現價即使未見底，相信亦離底不遠，但去年中期業績始終麻麻，故只宜小注怡情投機買入。