為遏抑樓價升勢，近年政府無間斷咁增加土地供應，令私人住宅動工數字爆升，舊年頭十個月私宅動工量已經超過1.5萬伙，是○七年之後嘅按年最高動工量，其中以荃灣區有近3,400伙最多，來源主要係嚟自兩大西鐵項目，至於包括將軍澳嘅西貢區就有近3,300伙排第二多，兩區佔整體動工量逾四成。反而近年有唔少新盤推出嘅屯門同元朗區，動工項目就比較少，分別只得479及687伙。

隨着土地供應不斷增加，私人住宅動工數字爆升。（資料圖片）

理想城市張聖典認為，個別地區供應增對樓價影響不大。（資料圖片）

劉Sir睇番屋宇署公布截到舊年首十個月嘅上蓋動工項目數據顯示，接獲嘅上蓋動工通知私宅項目一共涉及15,111伙，已經多過○七年後嘅按年數字。

荃灣有兩大西鐵盤

翻查番資料，各區上蓋動工項目當中，以荃灣區單位量最多，事關有長實地產（01113）嘅荃灣西站五期灣畔，同埋新世界（00017）同萬科置業（香港）合作發展嘅六期兩大西鐵項目。

單係呢兩個盤已經有約3,393伙，佔咗整體動工量超過22%；至於第二多單位量嘅區域，就係包括將軍澳嘅西貢區，期內動工量有3,281伙，佔整體近22%，主要嚟自四個將軍澳南項目。

市區樓向來做價理想，所以發展商近年都好積極喺舊區搞重建，劉Sir留意到市區包辦咗動工第三及四多。

其中，黃大仙喺區內只有一項動工項目，就係九建（00034）嘅牛池灣清水灣道35號聖若瑟護老院重建項目，動工量達2,058伙。

至於港島東區方面，就有嚟自嘅新地（00016）筲箕灣教堂里項目，同埋南豐柴灣道重建項目，動工量1,876伙，仲係期內全港第四多，而兩區大部分項目均未開始銷售。

屯門元朗僅千一伙

但係多個未來供應重點區域，喺舊年頭十個月嘅動工進度就較落後，好似近年頻頻有地賣出嘅大埔區，至今都仲未有項目動工，而屯門區三個動工項目，加加埋埋只得479伙，另外，元朗兩個動工項目就只涉及687伙。

理想城市企業估值部主管張聖典認為，個別地區供應增加，相信對樓價影響唔大，因為呢類地區地理位置同基建好啲，新盤除咗有本區客支持之外，又可以同時吸納外區客，反觀，偏遠嘅新界盤，客源始終限咗主攻本區客。