A-Z睇通2015金融大事

A股　A股今年之癲，唔使多講；仲有就係，球證、旁證、足協……全部都係阿爺嘅人。

Buffett（巴菲特）　股神神力不再，投資6年來最差，皆因升到開巷嘅科技股佢唔Like，佢Like嗰啲唔多升。

China Economy（中國經濟）　中國打噴嚏，世界就感冒。中國經濟數字上「保七」，但一旦失敗，新興經濟體全部要陪葬，好驚中國真係china（瓷器）咁易碎。

Drone（無人機）　跨國巨企全部搞緊用無人機送貨，人人玩航拍。

Euro（歐元）　歐央行係咁印銀紙，歐元今年分分鐘會跌至1兌1。

Facebook（臉書）　股價進身「紅底」，市值逾3,000億美元，世上只有6家公司勁成咁；教主朱克伯格舊年底添B女，仲話捐出99% fb股份。

Gold（金價）　金價飽受息魔滋擾，由舊年初每安士1,181美元，跌到尋日低見1,060美元，有大行估今年恐見800美元添。

Hanergy（漢能）　漢能（00566）股價舊年瘋漲，最高收市價上到7.88元，主席李河君做過一陣中國首富；五月股價「直插無水花」再拉埋閘，停牌前報價係3.91元……

Internet Shopping（網購）　舊年中國網絡零售額達4萬億元人仔，世界第一，單係「光棍節」一日已經係千億。

Jack Ma（馬雲）　阿里巴巴主席馬雲上咗《福布斯》雜誌封面，個名仲拍住「四萬大盜」，事關專題係講假貨王國；淘寶仲畀Gucci告賣假貨。

Korea（韓國）　南韓舊年當黑，年中「新沙士」打擊經濟，被迫減息，出口雙位數暴挫，韓圜一度創5年低。當地最大企業三星集團舊年智能手機出貨量首現萎縮，當地人氣輸畀Apple。

Li Charles（李小加）　港交所（00388）行政總裁李小加完美演繹「華麗轉身」。舊年六月底話A股係全世界最安全市場，到十二月初改口話A股市場可能係最危險。

Macau（澳門）　澳門經濟可能大鑊過希臘。當地博彩收入一沉不起，拖累經濟增長。

New Energy Car（新能源汽車） 　梗有一架電動車係左近。Apple話大搞，電動車龍頭特斯拉（Tesla）雖則燒緊錢每股蝕緊，但股價舊年照累升7%。蝕錢都咁把炮，明顯「錢景」無限。

Oil（油價）　舊年呢個時候，大家仲估油價會反彈幾多，實情係，每況愈下！

P2P（點對點服務）　網絡世界一日千里，P2P、B2C、C2C、B2B等名詞相繼冒起。唔知P2P係乜？唔緊要，今年你會聽到更多，一定會識。

QE（量化寬鬆）　好多人話QE係「金融毒藥」，美國發明，歐、英、日跟風。美國終於唔再依賴仲加息，反而歐、日愈踩愈深，英國可能今年會戒。

Retail（零售）　受累個人遊減少、港匯偏強，本港今年零售業銷情係○三年沙士以來最傷，個別商舖劈租逾六成。

SDR（特別提款權）　人民幣終於入咗籃（國際貨幣基金組織SDR籃子貨幣），但畀聯儲局前主席伯南克串，話似喺小學雞功課簿上獎粒星星咁。

Tong Man Leung（湯文亮）　湯文亮舊年二月憑「細價樓會喺三個月內爆煲」言論一炮而紅，之後無靈驗要「擺酒」，點知細價樓年底真係……

Uber（優步）　Uber以天價估值625億美元融資，賺晒投資者嘅Like，但就成為全世界的士嘅敵人。

Volkswagen（福士汽車）　美國廢氣檢驗作弊案幾乎「殺死」德國汽車業，肇事主角福士市值一度蒸發三分之一。

Wechat（微信）與WhatsApp激鬥，Wechat每月活躍戶6.5億，WhatsApp以9億先勝一仗。

Xiaomi（小米）　創辦人雷軍舊年初話，全年要賣8千萬部手機，結果小米畀高低端品牌圍剿，達標希望好渺茫囉。

Yellen（耶倫）　主席耶倫帶領美國聯儲局近十年來首次加息；位位供緊樓嘅都要睇佢面色。

Zombie Company（喪屍企業）　國企體制僵化，企業盈利主要靠阿爺支持，但舉債無度，畀人叫做「喪屍企業」。