淡市指數容易舞上舞落，昨日滬綜指上番接近全日高位3,563點收市，但滬市成交得2,509億人民幣。港股仲可憐，成交唔夠380億元，真係水盡鵝飛，即市恒指22,000點關得而復失，反正意義都不大。明日港股得半日市，都唔使點睇，等明年再戰！

又一隻二、三線股賣殼成功，呢隻係國際精密（00929），本月初股價在1元邊水平起步，三個交易日炒到上1.2元樓上，之後反覆回落，月中停牌。昨日復牌並公布獲內地寶安集團以溢價36%提全購，股價復牌後曾飆逾四成，高見1.58元，收報1.51元，升37%，高於全購每股現金作價1.5元。

國際精密溢價易手

寶安集團在深圳掛牌，現時主要業務涉獵高新技術、房地產、生物醫藥及綜合產業。交易公布後，國際精密股價顯著做好，昨日收市價相對全購價沒有折讓還略有溢價。

異動股方面，昨日見到A8新媒體（00800）登上主板十大升幅榜內，收報0.64元，升14%。主要是公司宣布，為籌備北京彩雲在新三板掛牌之擬定申請，聯營公司多米音樂集團計劃進行重組，預計明年三月底前完成，而公司主席劉曉松及新投資者等將向北京彩雲注資。

未來新三板將成為短炒資金的好去處，因掛牌的都係充滿活力的新興企業，冇往績，講國策、戰略產業、有點像風險投資，特色係升、跌都可以無譜。沾上新三板概念，加上本身係細價股，當金魚缸人氣回復，A8應唔愁炒作藉口！