美股前晚反彈，但恒指昨低開94點，本來中段有逾百點升幅，但尾段再掉頭向下，結果恒指收報21,274點，跌35點，九連跌，主板成交得671億元。今日為美國議息結果前夕，睇怕大家都繼續唔做唔錯，話唔定今日恒指會來個十連跌！

即月期指日市高水57點收場，報21,331點，未平倉合約10.9萬張。不過，國期才是主戰場。國期日市收報9,392點，高水48點，未平倉合約總數突破30萬張！反映現貨雖靜，但期市有得賭單邊炒家樂此不疲趕下注。

近日多次提及，恒指向下另一城池在20,939至21,130點。若議息結果公布後此關失守，向下一個支持區在20,300至20,500點區域。市況交投薄弱下，短線極端波動插穿主要支持區亦不足奇，但呢啲快閃場面布置倉位機會一瞬即逝，想捕捉機會嚟緊兩日就冇得偷懶，金精火眼盯實個市！