近排零售市道確實係放緩咗，尤其是街舖市況表現更加係走晒樣，之不過大型購物商場出租率依然高企，仍然有可觀租金收益。劉Sir收到風，港鐵（00066）最近就以超過2.98億元完成咗九龍灣德福廣場2期嘅補地價，將7至8樓嘅寫字樓樓面轉做零售用途，計番每方呎補價約莫8,156元。

港鐵看好大型購物商場收益，旗下九龍灣德福廣場2期寫字樓將改建商場增加零售樓面。（資料圖片）

中原工商舖潘志明（左二）預計，明年核心區舖位租售價會跌兩成。

睇番地政總署資料，九龍灣偉業街33號，即係德福廣場，最新以2.9848億元完成咗補地價，劉Sir第一時間搵港鐵求證，順便問下佢哋有咩部署。

青衣城每呎補9686元

港鐵發言人證實，公司正計劃改建德福廣場2期上嘅兩層寫字樓（7樓及8樓）轉為零售用途，將會增加商場樓面面積約莫36,598方呎，預計喺二○一七年第二季開幕。劉Sir屈指一算，今次每方呎嘅補價金額大約係8,156元。

根據港鐵資料，整個德福廣場總樓面超過89.3萬方呎，商舖數目有約250間。

劉Sir都知，其實港鐵近排都幾積極拓展旗下商場，好似舊年公司就為毗鄰青衣城嘅公共交通交匯處嘅部分樓面完成補價，計劃打造成總樓面大約13萬方呎嘅購物商場，補價金額達約12.61億元，計番每方呎要9,686元。

另方面，市場對街舖前景就唔多樂觀，中原工商舖潘志明同劉Sir講，今年舖市淡靜，預計明年首季都會低迷，第二季初短租商戶撤出後，吉舖會升，估計中檔品牌好似時裝店同化妝品店等積極落戶，預期出年核心區舖位租售價會跌兩成。

工廈拆售潮料持續

佢話，今年寫字樓空置率極低，估計出年呎價有機會上望4萬元，整體寫字樓呎價升10至15%，租金升5至10%；而工廈就預計會延續今年拆售潮，工廈呎價出年睇升5%，租金升5至10%。

另一方面，老友韋堅信測量師行林晉超就話，今個禮拜五截標嘅元朗東頭宏業西街與康業街交界商貿地皮，地盤嘅東北面有液化石油氣站，所以發展商要向政府提交風險評估同埋有關執行及落實措施，預計呢塊地皮估值約莫14.6億元。每方呎大約2,934元，係市場下限價。