零售市道淡靜，核心區街道再添吉舖，銅鑼灣怡和街一個原由肉乾店承租的單號地舖至一樓未有續約，該交吉新近再以30萬元放租，較舊租金低逾一成。另外，該區近月已由珠寶鐘錶商戶成行成市，轉型至時裝店街，劉Sir尋日行過銅鑼灣，見到百德新街附近一間原本一半賣鐘錶，一半賣衫及手袋嘅外國品牌，重新裝修後轉為時裝店。

銅鑼灣怡和街有舖位交吉放租，叫價較舊租金低逾一成。（資料圖片）

白沙道商舖錄短租個案。（資料圖片）

劉Sir尋日行過銅鑼灣，發現區內怡和街一個單號地下舖位連閣樓及一樓變咗交吉舖，舖位面積約800方呎，原由肉乾店以約34萬元承租，舖位現交吉放租，意向租金30萬元，較舊租金低逾一成。

旺角手袋店逆市搶舖

該區近日商舖類型轉變非常大，商戶類型亦有轉變，好似百德新街一間原本一半賣鐘錶，一半賣衫及手裝嘅外國品牌，見高檔零售產品銷售下跌，即時變身為全時裝店，櫥窗都唔同晒。

其實同區好多售賣珠寶鐘錶嘅高檔零售商早前都已經意識到個問題，喺完租約後不續租，新增嘅吉舖就由各類租戶如時裝店及短約利是封店等進駐，好似同區白沙道早前有一個原由鐘錶店承租嘅雙號舖位，面積約1,500方呎，交吉後由時裝店以約25萬元短租，令成條街都變咗時裝街。

劉Sir仲八到，旺角朗豪坊商場第三層有一間國際手袋品牌逆市擴充，該品牌原來以約數十萬元承租兩個舖位，但最近以約百萬元擴充承租多個舖位。

另外，西環忠正街雙號地下B號舖以約2,680萬元售出；而太子基隆街雙號地舖以約1,800萬元售出。

遠金呎價兩萬七成交

寫字樓市場，消息話稱，金鐘遠東金融中心中層單位，面積約2,350方呎，以呎價約2.75萬元沽出。另美聯商業都話，旺角華僑商業中心高層全層交吉放售，面積約3,400方呎，意向價6,000萬元。

此外，同區登打士廣場中層全層連約放售，面積約2,069方呎，意向呎價11,000元。戴德梁行話，葵涌活化工廈成功中心放售，意向價約12億元，平均呎價約5,000元，物業已獲批作活化工廈。