運輸及房屋局早排公布未來三至四年潛在私人住宅供應再創新高,但係近年政府批出嘅地皮唔少原本都係綠化地,或牽涉大型斜坡維修,令發展年期超長。好似之前同樣有大型斜坡嘅青衣細山路地皮,建築承諾限期超過八年,地皮最終更流標收場,依家市場上特長發展期地皮涉及嘅單位供應量至少超過4,000伙。有測量師指,如樓市轉差,發展商或會用盡期限甚至超時完工,項目難以趕及推售。

政府早前批出的延坪道地王,亦有規定發展商須保養斜坡。

早前流標的青衣細山路地皮,建築限期超過八年。

部分建築限期較長住宅發展地皮

青衣細山路商住地,早排有九間發展商入標都要流標收場,創一年半以來官地招標首次,估計亦令市場減少約740伙私宅供應,有分析指大規模斜坡維修係流標原因之一。

四地皮期限長 涉4230伙

事實上,政府早前推出嘅延坪道地王,亦都規定發展商須保養斜坡,最終幅地皮批咗畀世茂房地產(00813),但係每方呎樓面地價得大約1.1萬元,被指平過屯門地。其實兩幅地皮前身都係綠化地,地盤周邊都有斜坡需要交由發展商負責維修。翻查賣地章程,兩幅地皮嘅建築承諾期限都超過八年,同埋要喺同期完成相關斜坡工程。

今年年中批出兩幅分別由恒地(00012)及萬科置業(香港)奪得嘅屯門掃管笏地皮,賣地章程亦顯示建築承諾期限接近七年,比一般地盤建築限期大約五至六年為長。單計上述4幅土地,已涉多達4,230伙。

運輸及房屋局早前公布潛在供應數字,包括咗三至四年內可以推出市場賣樓花嘅地皮,如果地皮用盡逾八年限期,最快要在落成前30個月先可以賣樓花,咁即係最快都要喺地皮批出超過五年半後,先至可以推出市場,未能趕及供應市場。

工程或延 影響賣樓花

劉Sir老友產業測量師張翹楚話,如果美國加息、本港經濟轉差情況持續,發展商係有機會因應市況調節施工速度,或者係傾向用盡建築承諾期限甚至補錢延長期限,令批出熟地未必可以喺三至四年後推售樓花。

學者老友城大建築科技學部高級講師潘永祥就話,建築限期較長反映工序變數較多,工程進度延遲機會較大,未必代表實際施工期較長,只反映發展商需更大時間彈性,現市況暫未必令發展商減慢起樓速度。