另類物業受市場追捧，有拍賣行老友同劉Sir講，尋日拍賣會拍出一個由法院頒令拍賣嘅觀塘工廈無契天台，成交價只係7.6萬元，可以話係近年罕見嘅最細價物業成交，而呎價更加低至不足13元，依個價連一呎天水圍嘉湖山莊都租唔到。另外，聽講尖沙咀星光行天台廣告牌，亦有買家以約2.1億元出價洽購。

觀塘興業街一座工廈的法院令無契天台，以約7.6萬元售出，呎價更低至不足13元。（資料圖片）

中原潘志明（中）表示，石門安群街一號一樓全層命名為OK Mall。

忠誠拍賣有代理話，尋日賣出一個由法院頒令拍賣嘅觀塘興業街中美中心A座無契天台，天台建築面積約5,910方呎，以約7.6萬元開價，以一開即售形式拍賣，結果就畀一組買家承價一口，成功以7.6萬元購入，代理就話好難喺市場上搵到同類物業比較。

如果照咁計，天台呎價竟然不足13元，依個呎價連喺嘉湖山莊一呎都租唔到啦。另聽講尖沙咀星光行天台廣告牌，亦有買家以約2.1億元洽購至尾聲。

安群街OK Mall招租

中原工商舖董事總經理潘志明同劉Sir講，由投資者持有嘅石門安群街1號1樓全層，命名為OK Mall，該層面積約6萬方呎，依家推出食肆部分招租，面積約2.1萬方呎，舖位面積介乎150至9,800方呎，呎租就會參考同區商場，介乎45至75元，預計明年中交樓。

港置旺舖助理營業董事游柏榮話，由資深投資者蔡伯能持有嘅元朗西菁街95至100號地舖，面積約2,038方呎，以約6,700萬元連租約放售，呎價約32,875元，依家舖位就由韓國燒烤店以16.8萬元租用，租金回報約3厘。另銅鑼灣白沙道雙號一個地舖，獲時裝店以25萬元短租。

金龍車位50萬易手

有消息話，由會德豐持有的中環環球大廈26及27樓頂層全層，獲超過10組買家洽購，但就仲未落實。另外上環一洲大廈地下至三樓，獲買家以1.9億元洽購。

車位方面，世紀21日昇黃文龍話，天后金龍大廈一個雙號車位以50萬元易手，業主持貨三年，僅僅獲利5.2萬元。另荃灣沙咀道雙號三樓停車場一籃子私家車車位及電單車位，獲買家以約3,000萬元洽購。