本來美息轉變在即，環球市場經已陰雲密布，冷不防來個巴黎恐襲，投資市場避險情緒急漲，恒指低開失守22,000點關，埋單唔見三百幾點。理論上，恐襲對股市影響僅屬短期心理作用，相信短線若能守穩22,000點，後市毋須過於悲觀，畢竟月底IMF決定讓人民幣加入SDR的概率甚高，相信淡友行事亦會十分謹慎。

A股擬重啟IPO，相信上大人行得呢一步，唔會畀佢有咩差池，特別係今次同時已改咗遊戲規則，抽新股中獎先至要科水，咁就可以大大減少因抽新股凍結大量資金影響市場流動性，但順利重啟IPO只係讓A股正常化的一步，繼後還要解除對沽空的限制，反正七月救市後，冇一年半載，A股難復原。

新能源股逆市做好

德銀發表研究報告，指若然人民幣加入SDR，未來數年將有四萬億資金湧入中國市場。事實上，市場仍被A股救市一役的悲觀情緒所影響，對壞消息的反應大，對好消息則冷淡。可見，其實錢係其次，如何重建投資者信心，才是關鍵問題。講白一點，班外資唔會唔想搵錢，只係要確保本金安全，否則唔敢冒險落場。

昨日雖然係跌市，但亦不乏跌市奇葩，好似電動車充電樁概念的泰坦能源（02188）升7.6%，收報1.69元；中國動力控股（00476）升4%，收報0.52元。新能源股中，中國電力新能源（00735）升3.9%，順風清潔能源（01165）升4.3%，收報2.39元。順風股價由52周高位7.65元回落至最低曾見1.6元，一路坐貨冇走都咪話唔傷！

七月急跌以來，順風股價維持在2至3元水平上落，昨日逆市做好，成交回升，是否醞釀消息，不得而知。早前本欄亦曾提過，順風收購咗一家德國太陽能企業，拓展海外市場，另投資一家從事儲能電池管理技術公司的股權，到底呢兩方面有咩新進展，值得關注。純睇走勢，短線支持位在2.2元水平，小注跟炒首站阻力在2.6元水平，若要突破3元關，須有利好消息作配合。