將軍澳繼續有地推，港鐵（00066）區內嘅日出康城又推出新一期。今日起就本季計劃推出嘅日出康城第9期開始招收發展意向書，下星期一截止。市場估計該項目每方呎樓面補地價約2,600至2,833元，同第8期差唔多，估值大概29.4億至32億元。

港鐵將軍澳日出康城第9期（箭嘴示）今起招標，料最多建逾千七個單位。（資料圖片）

黎堅輝認為，樓市氣氛趨觀望或會令項目補價水平趨保守。
（資料圖片）

港鐵尋日公布，日出康城9期今日開始招意向，下星期一下午兩點截止。地盤喺南豐今年初投得嘅第6期旁邊，將軍澳車廠上蓋，地盤面積大約13.85萬方呎，可建住宅樓面112.06萬方呎，分布喺3座住宅大樓，提供不多於1,780伙。

項目計番即係每伙平均建築面積大概630方呎起；另外仲要起1間幼稚園，最高樓面大約有8,719方呎，至於全項目預計二二年落成。

早前由長實地產（01113）奪得嘅第8期，每方呎樓面補價金額大約2,830元。今次市場估計每方呎補價金額大約2,600至2,833元，都同8期差唔多，估值大概29.4億至32億元。

望堆填區 估價保守

劉Sir老友理想城市張聖典話，第9期估計要望堆填區同工業邨，景觀冇咁靚，所以都估平少少，不過就話到項目賣樓嗰陣，7期商場應該已經開幕，有利銷情，所以估計可以收20幾份意向。

中原黎堅輝就話，近期樓市氣氛趨觀望，加上青衣地皮流標或者會令補價水平趨向保守。

地政總署尋日亦都更新咗土地交易資料，菱電薄扶林道138及138A號近日修訂契約補地價6,737萬元；華懋亦就西貢碧沙路20及22號項目修訂契約補地價1,100萬元；另外西貢大網仔路101號業主最近亦完成2,153萬元換地補價。

銅鑼灣舖漲租兩成

工商物業方面，消息稱，銅鑼灣謝斐道雙號一個早前被新加坡餐廳棄租的地下至3樓部分舖位，新近獲知名麵家以30萬元承租，較舊租升兩成。

中原工商部劉重興話，觀塘成業街新怡生工業大廈7樓全層命名為K One，日內會推售首批20個單位，呎價約5,400元起，售價25.8萬元至290餘萬元。

此外，戴德梁行指出，由武夷集團持有嘅上環南和行大廈八層半樓面招標，意向價3.62億元。另外有市場消息指出，銅鑼灣新會道雙號地舖以約6,500萬元摸出，較今年初嘅購入價上升12%。