馬鞍山環境宜人，向來是上車熱門地，但之前旺市時細價盤升到癲，400萬元也幾乎買不到居屋，想置業難免望樓興嘆。隨着新盤湧現，區內二手樓市「捱打」，終出現買家期待的業主減價畫面，有心揀一定有啱Budget的上車選擇，甚至唔使四球都可買三房戶，實現置業夢。

馬鞍山不少年輕私樓臨海而建，嘉華星濤灣的入場費較相宜。

相比起市區鬧市，馬鞍山最得人歡心的是擁有寧靜而優美的海岸線，閒時一邊在海濱散步，一邊欣賞吐露港景色，享受香港石屎森林少有的悠閒寫意。

不敵新盤 業主減價

對打工仔來說，馬鞍山的交通配套絕不輸蝕，搭港鐵半個鐘內可到達九龍市區，返工去蒲方便快捷，難怪不少上班族情有獨鍾，令當區成為上車熱點。

區內代理指，受新盤爭相推售影響，二手樓市難免「捱打」，馬鞍山亦受拖累市況急轉直下，九月及十月主要私人屋苑只錄20餘宗及30餘宗買賣，與今年年中最旺時近百宗相差甚遠。面對大淡市，區內不乏有業主面對現實減價，雖然減幅未必一定符合買家的預期，但有心揾仍會揾到啱Budget的減價盤上車。

預算有限者首選偏離馬鞍山市中心的居屋錦英苑，自由市場價390萬元已夠買個三房戶，借足九成按揭之餘，住得寬敞舒服。想住馬鞍山市中心過至方便的生活，不妨考慮大型上車屋苑新港城，現時450萬元內放盤量倍增，最低消費降至420萬元。

若Budget較充裕想住年輕私樓，臨海濱而建的嘉華星濤灣是較相宜選擇，現時望山景兩房戶580萬元，較今年高位動輒六球平一截。