Fundman睇市：影業股憧憬最美好

不過，投資者暫時仍毋須將美國加息為洪水猛獸，怕因耶倫講明息口即使開始上調，未來調整的速度都唔會快得去邊，假設十二月首加，但利率期貨預測嚟緊一六年一月及三月再加的機會率，只係得8.1%及29.3%，要再加好大可能係講緊第二季之後。

深港通食咗鋪詐胡，A股居然當無事發生照炒，尋日滬綜指破埋三千五關，相對之下，港股玩家仲係比較理智，大市在兩萬三點水平爭持，埋單跌2點，收23,051點，成交縮番落去842億元。工信部一句講咗等於無講的聲明，話內地三大電訊公司未來的發展與整合，是根據市場需求來決定，惹來炒合併的憧憬捲土重來，中電信（00728）及中移（00941）分別升1.2%及0.2%，近排跌得最甘的聯通（00762）彈得最勁，升5.9%，是升幅最大藍籌，終於返到10元水平樓上。

內險股受捧有因

內險股近日走勢亮麗，當中以平保（02318）表現最突出，全日升2.83%，盤中更見兩個月高位，至於國壽（02628）有傳將以10億美元入股美國倉儲業務，有望成為最大跨境房產交易，股價亦升0.87%，收報28.9元，另外新華保險（01336）及中國財險（02328）則分別升1.88%及2.15%。

近日內地發布《中共中央關於制定國民經濟和社會發展第十三個五年規劃的建議》，當中提出全面實施城鄉居民大病保險制度，改革醫保支付方式，發揮醫保控費作用，相信建議可為內險行業帶來更多商機。而四家A股上市險企，今年首三季度共實現收益3,116億元人民幣，同比增加71%，難怪內險股近日持續有追捧。

副食品股達利食品（03799）下周招股，行家康師傅（00322）與旺旺（00151）雙雙腳軟，分別跌2.2%及1.7%收市，股民問影子股概念點解唔靈，講到底達利同兩隻藍籌對手市盈率相若，在行業估值拉動上冇乜幫助，反而前者多少令到基金注碼分流，沽舊換新，事關達利一旦以較高範圍定價，市值隨時大過康師傅或者旺旺，唔大唔買的基金，點都撐吓場入吓飛。

近年創業板興玩全配售，一班莊家夾手夾腳圍住炒，先賺一浸再順便啤殼，做法更係愈來愈猖狂，偏偏監管部門擺出一幅事不關己姿態，形成新股陷阱處處，股民一時貪念，隨時換來萬劫不復下場。

股民心態亦都好奇怪，兩毫子上市，即日乾挾去到四、五蚊，自認醒目嘅都識得防避，唔會貿貿然撲入去接火棒。但當見高位殺番轉頭，跌八、九成去番三、四毫子，即刻前仆後繼撈底，結果愈撈愈低，愈買愈揩，就好似避過天台玩笨豬跳，但卻響以為好安全嘅二樓跌死，總之史提芬奉勸大家，唔知頭唔知路，全配售街貨集中的新股，真係一次都唔好掂。

阿里影業炒注資

阿里影業（01060）向大股東阿里巴巴收購資產，包括線上電影售票業務，及眾籌投資拍戲的平台娛樂寶，作價5.2億美元，尋日股價最多升10.9%見2.34元，之後愈升愈少，埋單升得2.8%，報2.17元。睇番四月時，有意向阿里收購資產的消息，閒閒哋可以令阿里影業股價單日勁升兩三成，今日氣勢確實難與半年前相提並論。

上半年阿里孖寶借殼，生意轉型十畫未有一撇，股民卻未出發先興奮，相反如今實現注資卻反而被冷待，除了因為一場股災削弱了阿里點石成金的威力之外，捧場客睇見收購資產去年蝕緊1.4億元，望阿里影業能夠盡快搵到盈利項目支持股價的，亦難免會失望而回。即使假設股民願意與A股炒家一樣，對內地娛樂事業發展付出高溢價，但以目前華誼兄弟（300027.SZ）市盈率52倍作比對，547億市值的阿里影業，亦至少要交出十多億業績，短期睇落難度又幾大。

最近有傳阿里打新浪主意，土豆優酷睇嚟都有合作可能，姑勿論點，阿里影業股價中，大部分都係來自於對阿里系能成功構建娛樂王國的樂觀預期，對追求穩陣的投資者而言，應該就唔啱胃口。