Fundman睇市：銀行股風光不再

上周港股走勢明顯轉弱，僅周二有26點進帳，其餘日日跌，連埋周五179點跌幅，全星期累跌511點，收22,640點，10日及20日線雙雙失守，尚幸月初的急升，整個十月埋單計數，恒指還有1,794點進帳，升幅8.6%。

五中全會落幕，重新制訂人口政策，果然唔再係樓梯響咁簡單。人口紅利推動製造業，造就過去三十年世界工廠的輝煌歷史，隨住高齡人口所佔比例逐年向上，對政府養老、醫療開支及產業提升帶來的長遠壓力，中國開放生育政策已是刻不容緩。

乳業股高開低收

一三年底單獨二孩政策收效唔大，全國合資格夫婦僅5%申請多生，無疑是全面放寬的主因，但多年經濟高速增長，大幅城市化，養育小孩成本高昂，不得不提，現在處於生育年齡的夫婦，大都是一孩政策期間出生，假設夫婦之中，要一個全職照顧家庭，其中一個工作養家，要支持四位高堂，又要生兩個孩子的話，財政壓力唔細，並非政府叫你生就生，恐怕要激勵城市人生育，政府長遠可能要學西方社會，提供一些教育及直接財政支援方可。

姑勿論點，無消息落鑊的港股，政策總算帶來一點漣漪，消息醞釀期間，已經偷步的乳業及奶粉股，像合生元（01112）、雅士利（01230）、輝山（06863）及蒙牛（02319）等，上周五裂口高開後，大都貼近即市低位收，可見趁消息出貨者不少。

最威水都算係不見經傳的中國兒童護理（01259），一升就四成，收報1.05元升0.3元，貼近高位收，全日約3億股成交，相當於主要股東以外，4.7億股街貨的六成二即日在魚缸碌咗一轉。睇番上半年，兒童護理營業額跌兩成一，純利卻大跌七成三至3,077萬元人仔，二孩政策即使行得通，都至少要等母親十月懷胎，炒得太癲都係要小心為上。

以前，史提芬鍾意投資銀行股，始終有「百業之母」之稱，經濟發展舉足輕重之外，也較少受單一產業景氣盛衰之風險。一場金融海嘯爆發，銀行業的境況可謂一百八十度轉變。

環球銀行唔單止面對全球經濟增長放緩，傳統融資賺取息差的生意，風險與回報可謂今時唔同往日，進入漫長的去槓桿年代，各國央行肆意減息甚至長期零息政策，長短期債券孳息變得扁平；再者，銀行被妖魔化，發達國對銀行監管不斷收緊，歐美政府不斷發出天價罰單，巴塞爾協定三涉及的更高資本要求，銀行股由從前的基金至愛，到今日淪為股市中燙手山芋，可能係最多香港人捧過場的滙控（00005）股東，大抵都有同樣的體會。

德國銀行業一哥德意志銀行，近年生意處處碰壁，上周宣布年底前裁減九千員工，撤出十個國家業務，另1.7萬員工冀能在縮減跨國版圖中剔離。德銀、滙控等可是最佳例子，全球大型銀行面對監管成本不斷上升，同時受環球經濟不景氣持續所打擊，從上世紀不斷併購以拓展跨國版圖為榮，到今日被迫走上回頭路，把業務資源「合體」瘦身。

內銀股弱勢難改

見過他們上世紀最輝煌日子的，甚感唏噓，今次德銀大刀闊斧減磅，還會停派一五、一六年派息，是自一九五二年二戰後重組業務停派以來首次。到底跨國銀行最壞的時候是否過去？在下實在唔敢亂下定論，全球經濟低迷兼零息環境有迹象有排拖，短期真係冇重新睇好佢哋的理由。

講開銀行，內銀第三季業績已先後曝光，雖然低增長甚至輕微倒退已成新常態，但最後條大數（股東應佔溢利）唔跌，亦不代表係業績漂亮，尤其不良貸款比率及餘額「雙升」的情況未止，像龍頭工行（01398）不良貸款及不良貸款比率第三季分別升38%及0.31個百分點，去到1,714億元人仔及1.44%，期內貸款減值按年勁增1.34倍至193億元人仔。

君可見，今浪大市死貓彈，恒指衰極都掂一掂七月八日大股災的即市低位，四大行未到位卻已經被率先畀基金質番轉頭，睇情形內地經濟放緩的轉角位一日未見，令「雙升」趨勢停止之前，內銀股要翻生並唔容易。