近幾年收購舊樓愈嚟愈難，唔少發展商寧願諗政府地或者鐵路項目，搞到申請強拍數字一年少過一年，好似今年到依家只得12宗強拍申請，同舊年全年25宗相比，仲差約六成。今年比較特別係佔咗7宗屬於收購到九成或以上嘅項目，佔比例約58%，比起舊年約24%明顯高咗，相信係發展商之前見市旺，願意出手重啲，希望可以快快手完成收購舊樓。

今年內灣仔僅錄得數宗申請強拍個案。（資料圖片）

劉Sir數一數，今年到依家只得12宗強拍申請，暫時以恒地（00012）最積極，佔咗其中7宗個案。

不過由於唔少係斬件式個案，好似北角馬寳道同香港仔石排灣道項目，就分別分開兩宗申請，估值分別為6,871萬元及1.27億元，所以全部7宗加加埋埋估值只係約莫9.5億元。

寶華大廈值14億矚目

佢哋最新申請係石排灣道85至87號及89至91號舊樓，分別取得91.67%業權，現時估值分別7,659萬元同7,897萬元。

講到今年最大宗申請強拍個案，仍然係年初入稟嘅灣仔晏頓街、蘭杜街及皇后大道東嘅寶華大廈多個地段，涉及地盤面積1.2萬方呎，可建樓面約莫11.5萬方呎，估計市值約14.72億元，市場估計收購嘅發展商係太古地產（01972）或有關人士。

至於灣仔道222至228C號祥樂大廈，申請人為國森及新地，市場估計項目市值約8.21億元。

而今年比較特別係有7宗個案，申請人持有業權份數達九成或以上，佔比例約58%，相比舊年25宗申請中只得6宗，佔比例約24%，明顯多咗好多，相信係發展商之前見市旺，加上建築材料、人工愈嚟愈貴，希望可以快快手完成收購，所以去到收購後期會出手重啲。

事關持有九成或以上業權，一來反對聲音小啲，二來容易處理，所以審批申請強拍過程會快啲。

高峰已過 全年料13宗

萊坊估價及諮詢部主管林浩文話，強拍申請高峰期已經過咗，所以今年申請明顯減慢，估計全年都係得12至13宗，而未來一兩年情況都差唔多。

而產業測量師張翹楚就話，由於樓價高企，變相強拍難度多咗，發展商同小業主雙方爭持大，商討賠償額難度亦增加，如非必要，發展商都唔希望申請強拍。