重陽假期後，重開的港股水盡鵝飛，個市波幅得百四點。經歷十月初基金補貨的一輪攻勢，亦需要時間抖抖氣，尋晚歐央行議息暗示加碼放水，早兩日日本通脹再見紅，大家又賭安倍政府要再擴大量寬，如果歐、日再開大水喉，年底前想加息的美國，睇怕都郁唔到手，水浸全球情況持續，股市未來一季應該唔使太悲觀。

內地電影市場興旺，完全不受經濟冷風影響。（資料圖片）

周三假期期間A股插水，尋日尾市就報復式反彈，但港股通通唔理，低開後全日得個悶字，埋單跌143點，收22,845點，成交700億唔夠，10日線未穿前，大市傾向似整固格局居多。

油價反彈告終

藍籌方面，中移（00941）首三季業績升3.4%，比分析員估計理想，但怯於今個月開始引入「月費數據用量當月不清零」，第四季業績九成九九都會轉差，埋單股價跌3%。至於跌2.9%的聯通（00762），收市公布首三季賺81.81億元人民幣，按年跌22.5%，單以第三季計跌幅更達69.3%，貼近大行預測下限。

都奇怪上星期鐵塔公司重組消息，成條街人人唱好，聯通股價當日反高潮，高開見11.36元高位後，隊到開巷，尋日10元關都失守，同九月底股災低位9.45元僅一步之遙，睇嚟小弟又要為癡心錯付交學費矣。

商品價格同環球股市在十月冚倉之中衝完一浸，已見鳴金收兵迹象。睇番紐約期油十月初由每桶44美元樓下，一口氣升穿八月底高位48.42美元，以為旗形突破點都有十蚊八蚊美金升吓，殊不知衝到上50.9美元咁快又腳軟，前晚已輾轉縮番到45.2美元水平。

睇嚟波斯灣產油國財赤嚴重，逼住賤賣石油維持收入的威力，比油企勘探開支縮皮大得多，油價有反彈無力升，料50美元阻力唔細。世銀調低全球能源價格預測，三桶油跌2.6至2.8%，從油價及石油股走勢，十月初商品死貓彈，似乎已告一段落。

今年經濟保七睇落危危乎，大行近排陸續調低一六年中國經濟增長預測，當前環球經濟乍暖還寒，中國產能過剩的問題難以解決，製造業得番半條人命，世界工廠金漆招牌亦在褪色中。早幾日的第三季GDP中，中國第三產業，即服務業對經濟的貢獻超過一半，去到51.4%，比舊年多2.3個百分點，在結構性改革、產業提升的大趨勢下，股民似乎都要與時並進，投資焦點唔好再用舊有思維，淨係識望實爛銅爛鐵、製造出口，應改為側重較多服務增值產業。

個個話中國經濟有排搞，不過電影市場卻是一路奇兵，完全感受唔到經濟冷風。今年「十一」假期，全國唔少房地產展銷會人潮冷清，但同期電影票房卻達到18.75億元（人民幣﹒下同），比去年勁升七成七，而今年首九個月，全國電影票房收入累積330億元，按年勁升五成，比一四年全年已經多出34億元。

票房屢破紀錄

戲院開極都唔夠，票價加極都坐滿人，兩句形容晒當前內地影業情況。中國最高票房紀錄的十五套電影，八套屬二○一五年上畫，年初的《狂野時速》第七集，中國票房24.2億元，破晒外語片紀錄，計落收3.8億美元，居然比《狂七》美國本土的3.51億美元仲要高。

過往香港有東方荷里活美譽，近年大量人才北上掘金，但規管所限，發揮到幾多成功力心照，廣電總局規定的唔準有鬼、早戀唔可以成功、小三不能有幸福，香港人睇落都夠晒騎呢。合拍片未必係大家杯茶，但製作團隊、發行商以至院線，可以在中國電影熱搵真銀先係最重要。

本地有唔少電影業相關股份，好似有阿里影業（01060）、美亞娛樂（00391）、橙天嘉禾（01132）、寰宇（01046）、天馬影視（01326）、星美文化（02366）及意馬國際（00585）等等，睇見電影業熱爆的形勢，似乎值得大家做多點功課。若嫌炒味太濃兼難以捉路，可以留意早排上市的IMAX中國（01970）。

唔講唔知，內地IMAX票價介乎100至150元，比美國同香港仲要貴，仲成日出現黃牛飛情況，炒到三、四百元。論估值，呢隻半新股一啲都唔平，150億港元市值，舊年賺緊2,278萬美元，即1.77億港元，市盈率讀者自己計，純炒影業熱潮同獨家村概念，睇個勢基金已上齊貨，可以睇實。