上周五，聯儲局主席耶倫對經濟前景看好，語氣上更肯定地預告今年將會加息，加上美國第二季GDP被上調，華爾街股市反應算正面，可惜尾市獲利沽盤令升幅收窄，道指升113點，收16,314點，高位未能突破八月中至今的小型頭肩頂的左肩阻力16,669點。

夜期上周五收市報21,211點，較日市跌13點。經歷四、五月港股大時代，七、八月的跌市及救市，中港股市都進入沉澱期，尤其唔少中資基金在中央嚴打做淡下，對股市意興闌珊的絕對唔少，一些大戶甚至基金，抱少做少錯態度，甚至套回現金尋覓其他出路，市況陰陰乾落在所難免。

從港股多番嘗試重上兩萬二點不果，只怕九月市況能以牛皮尋底方向發展已算唔錯，在短期有技術支持，卻未有轉勢契機下，即使客觀睇港股及國企估值已相當吸引，若高位能夠成功減磅的，先抱現金靜候轉角市出現，可能是刻下唯一可做的事。