尋日港股保持人升我唔升的態度，芬佬質吓低啲，質吓低啲，最終四連跌，埋單插207點，收21,096點，成交得706億元，成交額與四月大時代高峰期的2,900億元相比，連零頭都唔到，股民哀莫大於心死，刻下港股估值係平，可惜歷史話畀我哋知，熊市之中低估值係相當有彈性，你以為0.6倍PB好平，結果可以見0.3倍，所以一日未有較明顯見底迹象，細細注玩吓無妨，但肯定唔係瞓身賭身家的日子。

內地車企八月份銷售數據好轉，帶動板塊氣氛。（資料圖片）

太陽日誌

話說習大大今次七天訪美行程，大批內地領先企業領袖隨團，媒體計數，至少掌控1萬億美金市值的公司頭目一齊訪美，包括中國網絡巨擘騰訊（00700）馬化騰和阿里巴巴馬雲。唔好以為訪問期間乜都唔做，馬化騰在十七至二十二日期間，先後四次減持騰訊股份套現32億元，計落九個月入面，累積套現近百億元。

互聯網股唔睇好

股聖彼德林治講過，企業高管減持意義及唔上增持，可能純粹個人理財需要，但發生在向來滴水不漏的中國企業身上，這樂觀想法睇嚟就唔係好啱用，話晒今浪中港股災，騰訊股價跌得唔算特別多，僅由170元落到130元邊，跌幅23%，比恒指26%，滬綜指的39%跌幅要少，更加唔使講，硬淨過死對頭阿里巴巴同期37%跌幅多多聲。

以130.7元計，一五年市盈率39.4倍，比整體大市不到11倍的估值翻幾番有餘，高估值反映投資者對未來增長前景極為樂觀的預期，但亦代表未來業績可以出錯的空間好細，萬一中國互聯網政策有變，甚至係放啲空間俾facebook一類社交網絡作有限度經營，都可能對估值高昂的騰訊構成重大打擊。在中國互聯網產業生物鏈上，企得最頂端的領袖都抱住有胡要食心態，我等凡夫俗子不明就裏，斷估都唔好同佢拗頸，之前炒過一輪的「互聯網+」概念股，有得走都係走咗先。

新世界（00017）全年賺191.億元，大升96.5%，末期息0.3元。過去一年新世界賣樓表現的確唔錯，物業發展收入（連合作項目）103.8億，分部業績32.9億，按年分別升8.6%及58.5%，趁市旺，預告今年將會推出2,500伙單位。

以年結時1,789億股東資金，每股淨值20.3元，依家股價7.82元，即係市價賣三八折。恕小弟不才，從來都唔識睇，亦甚少推介，折讓再大自己都係抱住只炒不揸心態，便宜一定有便宜的原因，唔信睇番香港兩次樓市高峰，九七年新世界股價46元，○七年27元，再睇依家幾錢，大家心照。

德國福士一架「蠱惑的車」，識得在排廢檢測期間自動作假，搞到呢家78年大廠老字號，形象一落千丈，行政總裁溫特科恩連日死口話唔關佢事，尋日終於都要認低威，引咎請辭為醜聞止蝕。

去庫存情況改善

全球高唱環保意識，在下近年到歐洲旅行所見，當地明顯同美國與亞洲崇尚純電動車及油電混燃車的想法好唔同，大部分歐洲車廠認為排放及石化能源應用有效性上，柴油車更勝一籌，會唔會仲有其他害群之馬使用蠱惑軟件避開排放測試，天曉得，幾可肯定係短期內，歐洲多國對柴油車肯定會驗屍咁驗，以防走漏眼，未來柴油汽車的研發費用，亦好可能水漲船高，市場環境對電動車及混燃車推廣相信比較有利，可惜香港食啱概念的，數來數去都得筆者麻麻哋、但基金卻相當捧場的比亞迪（01211）。

中國乘用車市場上，柴油車比例僅0.4%，影響應該唔大，講開車股，超過九成公司發表八月的批發數據，大趨勢係去庫存情況繼續有改善，銷售按年跌幅收窄到0.2至0.3%，比早兩個月繼續收窄。隨着庫存減少到不足兩個月水平，短期內汽車銷售按年變化好可能回到正數，有利於汽車股氣氛，亦係相關板塊八月底至今，普遍見逆流而上的原因，衡量到估值及一五、一六年增長，筆者認為都係吉汽（00175）最啱心水。