以為美國聯儲局唔加息住,而A股響習大大訪美期間被點穴一樣,企硬三千點樓上,港股斷估有運行,點知前晚美股企唔住,加埋朝早中國製造業PMI跌到○九年海嘯時水平,潺仔底的港股,立即冧山泥一樣,最多跌過787點,收市報21,302點,跌493點,應了「大淡好尾市」的股市傳統智慧。

蒙牛現時估值比金融海嘯時更低,諗得過。(資料圖片)

太陽日誌

近排港股十足十早排上果套熱門卡通電影《Inside Out》主角阿「愁」主導一樣,好消息無反應,壞消息卻草木皆兵,財新編制的PMI落到47,創六年半的新低,衰啲講,近半年中國經濟數據無邊瓣掂,股民應該早視為常態,仲係要響低位隊到阿媽都唔認得。

22000關沽壓重

講到尾,正所謂哀莫大於心死,芬佬實在睇唔到中國仲有乜「符弗」短期搞番好個經濟,自去年十一月人行減息、降準,放水不遺餘力,意想不到副作用谷高A股,國家打蛇隨棍上,想借資本市場之力抬番起個經濟,點知一場股災,打亂所有計劃,放水流動性增加對實體經濟的刺激,除樓市之外,幾乎唔多覺眼,下半年仲要加埋股災後,財富萎縮,金融業營收減低的後遺症漸漸浮現,實在睇唔到有乜出路。

股市救經濟試過,減息又出埋,習大大訪美話明唔會透過人民幣貶值刺激出口,咁到底仲有乜方法,從沉淪的中港股市可見,個市大部分玩家都諗唔到其他出路,選擇揸錢穩陣,形成一彈又引來一浸沽壓,過去一個月恒指四次彈上22,000點即刻畀人沽番落嚟,並非無因。

個市可以說是全國河山一片紅,超過千四隻股票見紅,滙控(00005)沽壓極重,近30億排成交榜首,早排散字派70元排出血肉長城,頂得一時但頂唔到一世,尋日連60元關都失守,跌1.15元收59元,一心諗住大笨象(股齡淺都未必會咁叫)穩陣的捧場客,肯定喊得一句句。

滙控尋日沽壓咁重,斷估都係受渣打(02888)所累,早兩日外電報道話渣打同美國監管當局和解之後,仲有同伊朗及伊朗有關連公司往來,可能要再度受罰,傳聞仲話由於係重犯,故唔單止罰錢,仲可能嚴重到吊銷美元結算業務。

最後結果係點無人知,近年美國政府確實發窮惡般,成日搵跨國企業開刀,啱啱德國福士被捉個正着,隨時揩過百億美元,海嘯之後,美國政府以包裝毒資產轉售、洗黑錢、外匯及拆息操控等罪名,經已向多間大型銀行罰上數以百億美元,本身歐洲及新興市場經濟已經無起色,仲要成日收到美國政府億億聲的罰單,跨國銀行固然有苦自己知,近年少做少錯,愈玩愈縮,投資者亦怕晒不時爆出的罰錢新聞。

內地奶粉市場競爭日益白熱化,似乎未來得兩條路走,一是像合生元(01112)般走出去,收購健康食品作橫向發展,或者好似雅士利(01230),在奶粉市場上擴大市佔率,透過整合提升規模效益,望能減少生產成本及優化銷售網絡。

雅士利積極壯大

雅士利剛向控股公司蒙牛乳業(02319),以10.5億(人民幣.下同)收購其奶粉生意歐世蒙牛。蒙牛本身強項是液態奶製品,歐世蒙牛去年之前,其實都處虧損,去年其總資產4.2億元,淨資產500萬元,營業收入為7.24億元,淨利潤7,900萬元,出價固然比資產淨值高出不少,13.2倍收購價可以話平,亦可以話貴,好的角度是雅士利往績市盈率23.2倍,如果今年業績不是面目全非的話,應該對每股盈利及擴大業績基礎有正面的好處。

話說回頭,一三年蒙牛以124億港元,或者每股3.5元買雅士利,今次不算低的出價,且全數現金支付,難免被外界看成是削肉還母的交易。

姑勿論點,進口奶粉減價戰,雅士利處於被動,於內地奶粉市佔率下跌是鐵一般事實,藉收購做大個餅同外國品牌抗衡,無可厚非,估計更大的交易,向第二大股東法國達能收購多美滋中國資產,屆時將有機會在內地奶粉市場上,佔有率三級跳,坐二望一。

講實在,執靚檔攤以面對激烈競爭的生意,非三兩個月可成,反而藉交易套筆現金兼賺到一次過收益的蒙牛,撇開交易一五年市盈率16倍,比海嘯平均25倍低三成六多,早排對手伊利都話太平出嚟回購,現價蒙牛真係諗得過。