美國九月唔加息令不明朗因素繼續發酵、歐洲多國面對難民潮問題,周二晚歐美股市已經各有各跌,昨日連財新公布的中國九月份製造業採購經理指數(PMI)都跌到落○九年三月以來新低的47,令市場恐慌情緒進一步加劇。

A股精要

仔細睇PMI各分項數據,新訂單分項從46.6跌到落46,為三年多以來新低;產出分項亦創六年多以來新低,揭示內地製造業疲弱情況,就算習近平在昨日演講中強調「加強和創新宏觀調控,促進經濟增長保持中高速水平」,但從昨日中港兩地股市都齊齊下跌的情況,以至澳紐等與中國經貿息息相關的貨幣皆回軟已幾可肯定,市場投資胃納確實唔多掂。

走勢上,滬綜指昨日低開低走,收報3,115點,跌69點或2.1%其實不算甚麼,事關近期指數仍維持在3,000至3,250點之間浮沉,最慘係滬深兩市成交都仲係無起色,昨日加埋得5,790億元人民幣,與高峰時日日過萬億元相差一大截。港股就更加無眼睇,跌就一定有份,升就慢過人,昨日恒指裂口低開後最低插近787點,最終報21,302點,跌493點,成交多番些少主板有926億元,不過跌市成交增,都唔知講乜好!

環保概念有排炒

近期市況飄上飄落,都係揀一些業務性質較穩陣股份最實際。內地環保概念長炒長有,好似「大氣十條」、「水十條」及「土十條」先後推出,加上「十三五」規劃隨時加重環保力度,早前環保部就預期一六至二○年期間,內地環保投資將達6萬億元人民幣,較「十二五」投資額增逾三成,相信主打環保業務的光大國際(00257)可受惠。

睇番光國今年上半年業績「靚仔」,期內收入較去年同期上升28%至37.7億元,盈利亦增加25%至10億元。另外,光國除食正環保條水喉外,亦有國企改革概念,因為國務院早已批准中國光大集團總公司的重組方案,集團作為母公司旗下環保業務旗艦,若有新消息,股價隨時一飛沖天。

光國股價自八月尾開始反彈,10日線已上破20日線,下方支持位逐漸上移,MACD牛叉持續,走勢利好。昨日股價跌1.2%,收10.7元,成交4,811萬元,現水平炒短線就話要靠運氣,但長線計落點都有數圍。