近排樓市麻麻哋，但地點好又喺具重建價值地段嘅物業，叫價一樣可以好高，劉Sir尋日去咗睇私人拍賣會，推出嘅物業有唔少豪宅物業，但最特別係一個喺核心購物區銅鑼灣駱克道嘅唐樓，面積得500幾方呎，開價要成4,500萬元，呎價高逾8.2萬元，相信係本港呎價最貴嘅唐樓，拍得住山頂區豪宅傲璇。

銅鑼灣駱克道有唐樓單位，以4500萬元推出拍賣。(資料圖片)

比華利山別墅銀主盤未獲承價。

駱克道唐樓拍賣盤資料

尋日去咗黃開基拍賣行，劉Sir發現有個拍賣盤非常特別，一個駱克道單號二字樓單位，樓齡六十年，實用面積只約543方呎，開價竟然高達4,500萬元，照咁計法，呎價高達82,873元，拍得住山頂區豪宅傲璇，可以話係一個天價放盤，但最終賣唔出。聽講業主見附近有好多收購項目，所以就以理想價放盤，市傳仲有收購公司查詢過，而家個單位就由一間美甲店，以2.6萬元承租至一九年，咁計租金回報1厘都無。

到底個盤有咩咁特別呢？劉Sir尋日立即去呢個盤現場直擊，發現原來係唐樓單位，成條街大部分唐樓嘅1樓至2樓都做緊樓上舖，包括書店同美容店等，而地下就有連鎖時裝店同鐘錶店等，人流非常旺。再睇返土地註冊處資料，上址○○年成交價為95萬元，較開價高逾46倍。

比墅銀主盤未獲承價

另外，該拍賣行亦以9,300萬元推拍大埔比華利山別墅溫莎道雙號屋銀主盤，但未獲承價。市場亦有全幢物業標售，第一太平戴維斯李偉文話，中環威靈頓街64至66號全幢商業物業標售，意向價8.8億元。

深水埗重建今招意向

劉Sir收到風，市區重建局再次喺政府公布新季度嘅賣地計劃之前「偷步」推地，該局公布，深水埗海壇街205至211A號需求主導項目喺今日開始招收發展意向，截收日期係十月七日。

呢個項目地盤面積約4,553方呎，提供約莫69個單位，另設大約6,825方呎嘅商業樓面。

老友戴德梁行張翹楚就話，近排市況差咗，呢個項目規模細，將來部分單位要用作樓換樓安排，會減低項目靈活性，但對發展商影響唔大，佢估計每方呎樓面地價約5,760元，計番估值約莫2.36億元。