全世界玩完猜謎遊戲，股市表現又復平淡，上周五A股與港股指數窄幅上落，皆因美國議息前已回勇，依家要再炒上，都要搵個新理由。展望本周，睇吓「習奧會」兩國共謀發展有咩利好消息，另因月底的一周夾雜中秋假期，跟住又係「十一」假，話唔定月底季結效應可能會提前在本周出現。

中證監呢頭話要嚴肅清理券商配資，但又驚再引發恐慌孭鑊，之後又話不要一斷了之，總之神又係佢鬼又係佢，謀事欠深思熟慮。

事實上，在西方眼中，今次內地處理A股市場槓桿失控問題手法拙劣，始終金融市場運作係同胞們弱項，仲有排學，上大人懂得鼓勵中企走出去收購海外資產，點解監管機構唔請教番啲懂市場運作的先進們意見，等政策執行得順暢啲，減少不必要的負面影響？

中美兩國元首會面是本周市場焦點，聽聞國家主席會同股神巴菲特、中概科網股代表人物馬雲等會見。上周五見基建、科網股率先炒起，中交建（01800）及中鐵建（01186）同升逾3%、中國機械（01829）升4%；科網股慧聰網（02280）升近三成、IGG（00799）升約一成半、天鴿互動（01980）、酷派（02369）及神州數字（08255）升逾一成，呢個板塊真係好耐冇見過咁旺場！

IGG試叩4元關

事實上，科網股非息口敏感，第三季至今股價普遍低迷，海內外芬佬要在季結炒高一浸動機都唔難理解，本周可以關注。其中，IGG股價近月回落至2.6至2.7元水平現承接，上周五收報3.2元，成交明顯增加。兩手準備，若本周交投維持，突破50日線3.52元，試叩250日線4元大關；惟若掉頭失守2.9元，則宜嚴守止蝕。

申尚泰