股市永遠就像鐘擺一樣，在兩個極端之間遊走，短短兩日之內，港股低位反彈千六點，隔晚美股勁升，股神巴菲特在電視訪問中公開唱好中國投資，無疑只係為昨日的升市錦上添花，老掉牙的股市傳統智慧話，技術反彈往往發生在股市一面倒的悲觀情緒下，毫無疑問在大行個個唱睇兩萬甚至萬八點之下，專收叻仔的股市，把一眾遲來的淡友狠狠教訓一頓。

二線內房債息低，反映市場對其前景有一定信心。（資料圖片）

太陽日誌

昨日大市幾乎是周二的翻版，由頭升到尾，恒指最多升過970點，收市升872點，報22,131點。挾淡之下，現貨成交增加至1,154億，全日89隻熊證被收回。

說老實話，過去兩日整體大市的基本因素，其實沒有大轉變，八月數據顯示，中國出口經濟依然不振，在大宗商品價格疲軟、內需不足下，就連進口情況亦令人難以樂觀，基本是沒有多大理由去支持睇好中資股份，純粹是因為傳統以至對沖基金，現金水平根本已經相當高，亦為跌市在衍生工具做到全面甚至做「凸」了套戥，結果挾倉一開始，不能不加入追貨。

股神金口撐A股

七月股災加埋粗暴救市不果，依家街外有參與A股的芬佬，十個有九個睇淡，見A股長期只係有波幅無升幅，剩低果個甚至摺埋唔玩，估唔到前晚巴菲特接受美國電視專訪竟唱好中國，認為北京反貪腐見成績，而且這世界第二大經濟體經已搵到世界大國成功的要訣，長遠值得睇好，確係估佢唔到。

不過，小弟認為大家實在唔應該對股神的睇法得太認真，事實上，股神除咗N年前食胡的中石油（00857），以及仲持有的比亞迪（01211）之外，多年來都鮮有真金白銀到華投資，講同做明顯係兩回事。

反而，佢講到美息有啲參考價值，老人家預期美國長期經濟增長大約維持百分之二，只算係不慍不火，又認為美國利率假如遠高於歐洲，會對出口構成不良影響。

展望下周三、四，聯儲局一連兩日議息，委員會唔會聽吓老人家意見？目前利率期貨顯示，九月加息機會率只係稍高於三分一，八成機會仲係留番十二月至出手，但幾可肯定，港股過去兩日挾得幾勁都好，下周美國議息前，多少會投鼠忌器，只怕指數返到兩萬二樓上，可能要牛牛皮皮幾日之後，先會見真章。

講開比亞迪，近排汽車股紛紛見到報復式反彈，傳統生產內燃機引擎汽車的廠商升到甩碌，皆因多間車廠的八月份銷售數字，按年跌幅比大行估計細，有多少復甦味道，估值最低最值博，應該首選吉汽（00175）同長汽（02333），而八月新能源汽車銷售逆市狂升3.73倍的比亞迪，固然係芬佬本地惟一之選，不過實在令人懷疑，今日低油價之下，推銷新能源車會唔會好似逆水行舟，阻力愈來愈大？

長和重組料完成

繼長實地產（01113）的重組分拆，長江基建（01038）和電能實業（00006）宣布合併，一四年初電能拆出港燈（02638），被視為長和系睇息升，在yield player減磅，今日終於行多步，將資源歸納長建，無疑是趁美元強，歐、澳、加、紐大把平嘢執而鋪路，長和系的世紀重組也隨着最後的合併，應該進入尾聲。

早排個市日日插，無乜好買走去問私人銀行賓架，攞份高息債列表參考參考，基於個市對中國減息預期不斷升溫，加埋個個睇死阿爺唔會畀內地樓市出事，唔睇猶自可，見到唔少垃圾級別的內房債券，居然得嗰6至7厘，可以話離晒大譜地低。老老實實，如果出到7厘唔夠走去博BB級以下垃圾債，倒不如收5厘幾6厘，買番幾間有名有姓的跨國大銀行永贖債券，博聯儲局唔加到幾多。

不過話說回頭，既然班高息債玩家當正堆內房企業，至少未來三、幾年一定唔會出事，可以如期還到錢畀債券投資者，咁依家股價殘到死的內房股，至少短期有錯價之嫌，大大聲細細注一試無妨，短炒二線內房，睇來睇去以富力地產（02777）以及世房（00813）最啱嘴型。