蚊型住宅新盤細細粒容易上車，廣受買家歡迎，發展商自然愈起愈細，唔少都細過200方呎。由資深投資者盧華家族集團發展嘅尖沙咀AVA 62，尋日就首次介紹項目的單位間隔等詳情，而最細嘅單位面積就驚現151方呎，成為一手新例實施後全港最細嘅一手新盤單位。

AVA 62發展商盧文德（右二）表示，該盤主打開放式及一房戶。

新地雷霆（左）表示，東環II星期六發售338伙。旁為胡致遠。

少於200方呎單位的新盤一覽

驚現超迷你單位的AVA 62發展商Wisdom Gaining Limited，其項目策劃總監盧文德同劉Sir講，該盤提供88伙，單位實用面積由151至253方呎，主打開放式同埋一房戶。項目3至28樓係住宅樓層，一梯4伙，開放式佔咗77伙，一房戶佔11伙，估計一七年第二季落成。佢話預計第四季推出市場。

東環II原價加推96伙

劉Sir睇番，呢個盤最細嘅單位喺3樓C室開放式連平台特色戶，單位面積只係得151方呎，但個平台就有88方呎，係新例後全港最細嘅新盤單位。其次就係長實地產（01113）大埔嵐山第II期165方呎嘅開放式單位。項目經理蔡仁輝話，項目喺集團總部尖沙咀加拿芬廣場搭建一個示範單位，而項目商業樓面約莫5,000方呎，傾向收租。

其他新盤方面，新地（00016）副董事總經理雷霆同劉Sir講，東涌東環II收票反應踴躍，尋日再加推5號價單共96伙，價單平均呎價13,242元，折實即供平均呎價11,786元，都係原價加推。本周六將再推售338伙，價單市值約20億元。

新地代理助理總經理胡致遠補充，東環II截至尋日已經收票超過2,000張。銷售安排顯示，新地星期六亦會安排員工認購東環II單位。

維港．星岸擬暫封盤

長實地產投資董事郭子威話，紅磡維港．星岸暫時賣咗近100伙，套現約24億元，平均呎價約2.4萬元，暫推價單只係剩番27伙待售，市值逾5億元。

佢又話，呢個盤將會喺出年中入伙，估計入伙前呢個盤售價有10%上升空間，所以落實喺本月十五日起提早取消售價3%折扣優惠，並會喺當日暫時「封盤」。佢又估計，維港．星岸有機會保留到出年入伙後先「解封」，入伙前有機會再加價。

另外，恒地（00012）馬鞍山迎海．駿岸及筲箕灣柏匯尋日分別發售93伙同46伙，市場指分別售出約8伙與10伙。