沙田第一城是近年新界東最Hit的大型屋苑之一，單位細細，雖然呎價計拍得住市區樓，但勝在樓價平，容易受落，深受上車客及收租客追捧，更成為細價樓升市的火車頭，樓價長升長有，旺市時要搵個400萬元以內的放盤不易。

市況偏靜，沙田第一城業主普遍增議價空間。

屋苑臨近城門河而建，而且坐擁馬鐵優勢，住戶落樓下即達商場及巴士總站等配套，生活自給自足。閒時在城門河邊踏單車，生活優哉游哉。

議價空間增至半成

美聯黃錦翰表示，受股市波動影響，上月只錄22宗買賣，市況淡靜，業主普遍增議價空間，部分由原先的1至2%調高至3至5%，而近月基本上絕迹的4球以內放盤有望重現。

他續說，想交通方便可揀鄰近港鐵站的37座，一個低層兩房戶，實用面積284方呎，業主上周放盤時已叫400萬元，較今年年中同類單位高位做價回落近4%，買家肯還價很大機會平過4球上車。