紅磡黃埔花園自成一隅，臨海而建的居住環境，深得中產家庭歡心。屋苑配套更是亮點，住戶行幾步即達大型購物商場，Shopping、睇戲隨心所欲，而且未來有港鐵觀塘延線貫通，四圍去方便快捷，難怪近年屋苑樓價有升無跌，要業主減價難過登天。

黃埔花園上月成交驟降，有業主開始減價出貨。

近期股市立立亂，加上同區新盤搶客，黃埔花園即使樓價再硬淨，也難獨善其身，中原王志林表示，上月屋苑僅錄8宗買賣，市況年內最靜，雖然普遍叫價仍硬淨，就算肯議價，最多回歸市價，但仍有業主見勢色不對，願意讓步減價，尤其是一些銀碼較大的三房盤，出貨心態較進取。

三房連環削價8%

他指出，現時三房入門盤可放眼鄰近商場的11期11座低層戶，實用面積639方呎，八月曾叫890萬元，與今年同類高位做價睇齊，業主見市況轉淡，一個月內連落兩口價至820萬元，減幅近8%。