北水動向：汽車股缺乏大彈條件

眼見阿爺大派紅包，期指淡友怎會不高興？昨日A股收市後，港股跌幅明顯擴大，即使金管局注資消息亦無助支持市況，埋單恒指唔見接近五舊，似乎正在預先反映閱兵後下周A股的利淡行情。

中資股掀新跌浪

筆者呢排「口淡淡」，但以事論事，不存在刻意唱淡。軍工股炒作重組概念經已有一段時間，會唔會在閱兵後來一次洗白白？總之各位要睇路！事實上，除概念板塊鑊氣全消之外，呢轉港股反彈，中小型股份唔跟，足以反映投資者信心低迷，食「彈散」係心裏有數。近日就連重磅中資股，亦紛紛失守708低位，創五十二周低，如蒙牛（02319）昨日跌6.8%，收報25.25元；建行（00939）公布完中績之後，股價創五十二周新低5.33元，恐怕又係新一輪跌浪先兆！

再睇吓汽車股板塊，昨日有兩隻逆市高收，分別是東風（00489）及北京汽車（01958），同升逾2%。其實，今年第二季經已見到內地汽車銷售增長開始放緩，無論造車抑或分銷，都受影響，估值受壓，次季初汽車股已開始集體跳水，現價相對去年底仍有得升的只有吉利汽車（00175）同比亞迪股份（01211）。長城汽車（02333）的「飛車」飛出事，今年以來股價累跌逾五成。

展望第四季，以行業景氣而言，不見得汽車股具備大幅反彈的條件。惟新能源汽車受國策支持，還可以望多兩眼。東風上半年中期賺68.85億元人民幣，按年跌19%，預計下半年經營環境仍極具挑戰。近日其股價跌至○九年七月以來低位，可以講股價表現已預先反映行業淡風。見到近日股價下跌成交放量，似乎有人辭官歸故里，有人漏夜趕科場，只是在有更多數據支持行業回穩前，還是審慎行事為妙。