上周四、五所見，國家隊都係臨尾市先至入場托高指數。老實講，如果真係好想買貨，應該唔會咁樣度縮數等尾市先至動手。故筆者相信，這只是閱兵前的維穩措施。過咗九月三日，A股又好可能回復疲態，而上大人又會係唔到最後一分鐘都唔做嘢。所以，九月上旬應該是趁高位留意淡倉部署的好機會。

內銀股風險急增

滬股通連續四個交易日錄得逾280億元人民幣資金流入後，上周五斷纜，錄得淨流出逾24億元人民幣。到底所謂的「聰明錢」，係咪真係趁低吸納作長線持有，抑或另有目的？反正呢幾百億，相對於刻下環球股市動盪，杯水車薪，暫時唔好因為呢個數字而減低對A股風險的警惕。

板塊方面，四大行公布中績，整體而言，其實盈利數字不是關注點，皆因早在預期之內。反而資產質素下降以及息差壓力，才是關注點所在。下半年股市大幅波動，中央救市的代價，一定程度轉嫁到銀行身上，當指數反覆尋底，次季的上市公司股權質押風險將表露無遺。

內銀小股東要分擔國家維穩任務的代價，風險可謂前所未有。若然仲未上車，且別以往績市盈率就作出內銀股估值便宜的結論，甚而作出所謂的「低吸」決定。謹記若年底前中國風險再次上升，至引發環球股市暴跌的層面，內銀股頗大機會集體下試一一年的低位。