上周五滬綜指續升148點至3,232點收市，但港股無再跟上，恒指收報21,612點，跌226點，主板成交略減至1,128億元。事實上，上周五中港兩地股市走勢背馳，就算A股短期再升，港股都未必再跟。無他，港股資金始終較心水清，眼見A股今次「人為托市」只不過將A股市場國有化，加上內地經濟有幾好路人皆見，既然長線唔多樂觀，股市點會有運行？

九月期指日市收報21,536點，夜期收21,585點，升49點，低水27點，全日成交7.13萬張，未平倉合9.07萬張；九月國期夜市收報9,812點，升56點，高水61點，成交亦略欠人氣。

恒指上周五未能回補下跌裂口22,185點，仲營造大陰燭，10日線得而復失，走勢頗差，但要沽可以等多陣。至於國期既然重上9,800點，按早前策略今日可睇位沽，繼續炒即日鮮，穿一萬點止蝕。