股市同樓市嘅關係向來係唇齒相依，七月份股市波動，劉Sir知道，呢個月本港一手住宅成交量向下，但係仍錄到約莫11宗撻訂個案，佔全月一手住宅成交量比例約1.6%，較五月同六月分別增加1個百分點及0.7個百分點。有學者同劉Sir講，股市波動影響買家嘅心態，對後市憂慮多咗，同時影響財富效應，令到撻訂個案增加並唔出奇。

港股波動，一手樓銷情亦受影響，撻訂個案增多。（資料圖片）

美聯布少明表示，部分買家擔心股市拖累樓市，因而撻訂。
（資料圖片）

最近劉Sir睇番資料，多個原本部署五月開售嘅新盤順延到六月開售，據一手銷售資訊網頁資料，五月份一手住宅僅錄逾千伙成交，但約只有4個新盤出現交易未有進展個案，涉及單位約6伙，佔全月一手成交量比例約0.6%，其中旺角Macpherson Residence佔一半，有3宗。

相反，六月份有多個大型新盤推售，一手住宅成交超過1,500伙，比五月份急升逾500伙，而呢個月共有大約14宗交易未有進展個案，涉及約9個新盤，佔呢個月一手成交量比例約0.9%，當中將軍澳帝景灣就佔5宗。

11宗無進展 涉十盤

不過，七月份股市波動，拖累新盤推售部署，呢個月全港一手新盤只係得大約700伙成交，比六個月急跌超過五成，但合共都錄到11宗交易未有進展個案，涉及10個新盤，佔呢個月成交宗數比例約莫1.6% ，較五月同六月分別增加咗1個百分點及0.7個百分點。

對於上月份新盤撻訂個案增加，理工大學建築及房地產學系教授許智文同劉Sir講，股市影響買家心態，而股災影響財富效應，樓股效應喺埋一齊，股市好啲，人人就會入市買樓。

股民補倉影響入市

但相反，若股市波動，啲股民就要補倉或者「斬纜」，或預備過寒冬，所以新盤出現撻訂現象唔出奇。

依家股市相比起早前跌市時穩定咗，如果股市向好，樓市反應好，相反港股跌市，樓市反應亦唔好。

美聯住宅部行政總裁布少明亦都話，七月股市較波動，恒指一連數日，每日跌近千點，部分新盤買家採取撻訂唔出奇。

他又指，部分買家對後市擔憂，擔心股市拖累樓市，再者股市波動大，部分已經落訂嘅買家可能受資金因素影響而入唔到市，導致撻訂個案上升。