美股隔晚大幅反彈，中港兩地股市尋日順勢高開，滬綜指尾市更重越三千關，盛傳是國家隊出手，加埋歐股高開，恒指挾穿上晝高位，收市升758點，報21,838點，總算來一次較似樣的反彈！今日港股期指結算，截至昨日為止，八月恒指最多跌過3,775點，經已是連續四個月低收，全月高低波幅高達4,059點，破咗一一年八月高低波幅3,940的紀錄！

內地行業政策向本土新能源車傾斜，比亞迪自然受惠。（資料圖片）

太陽日誌 2015/8/28

走勢上，尋日反彈市乃恒指50日線跌穿250日線，俗稱「死亡交叉」後的首個反彈，終極目標可以睇到上50日線24,700點水平。不過，眼前係先補番個下跌裂口，企得穩喺22,200點樓上整固已算唔錯！至於A股，尋日滬股通使用額度有48億人仔，四個交易日使用額度超過287億人仔，睇嚟真係有外資人棄我取，暫時且先觀望，好、淡倉都唔使心急開住。

蒙牛可分注收集

尋日藍籌股只有一隻低收，就係蒙牛乳業（02319），收報28.9元，跌3%，表現真失禮，主要係中績表現遜預期，且公司預計下半年原奶產能過剩情況持續。不過，蒙年股價由次季高位51元反覆回落至30元樓下，調整已反映行業狀況，短線27元是雙底支持所在，即使在極端市況下失守，相信24至25元有好大承接。若然睇好內地乳業重組兼併，長線可以開始部署分注收集。

藍籌股尋日最靚仔係隻中海油（00883），公司宣布中期賺147.3億元人仔，跌56%，期內平均實現油價為每桶57.53美元，同比大跌45%。老實講，國際油價跌成咁，中績盈利倒退就預咗，反觀實際出嚟的數字叫做略勝預期，且維持派發每股中期息25港仙，即派息比率變相上升，對長期捧場的小股東來說，都算係一個好消息。難怪尋日股價咁醒神，收報9.22元，升14%，股價大成交回補了周初的下跌裂口，相信短期會先在9至10元水平整固。

同樣因業績消息刺激股價一洗頹風的，還有比亞迪股份（01211），股價高位見32.8元，收市報32.25元，成交有5.08億元。睇番份成績表，半年賺4.67億元人仔，對於一家市值達295億元的上市公司而言，呢個利潤金額唔算好多，但以其過去兩個財年純利分別只有5.5億元及4.3億元人仔，如今半年賺4億幾都算唔錯。

期內汽車業務銷售增長四成，手機相關業務銷售按年升4%，光伏業務則跌8.5%。由於內地智能手機市場增長放緩，下半年手機業務能保持平穩已不俗，而二次充電及光伏業務則壓力未消，故下半年焦點都係落在汽車業務身上。

上半年新能源汽車銷量約2萬輛，銷售額按年增1.2倍至58.7億元人仔，在內地新能源汽車市佔率近30%，表現令人鼓舞。管理層預計下半年新能源汽車銷量會增至4萬輛，產銷上的規模效益可期。雖然油價下跌較有利傳統汽車銷售，但由於內地國策向本土新能源汽車製造商傾斜，比亞迪作為龍頭企業，未來業績應可漸入佳境。

新能源車銷情佳

比亞迪經營表現在市場預期之內，惟股價已由次季高位大幅回落逾半。不過，論估值，股價跌至25至30元區域，再沽的理由並不多，只是季內反彈40元關又頂到冚，策略宜在30元或樓下買，接近40元就沽，炒波幅，直至業績再有驚喜為止。