昨日中港兩地股市繼續玩過山車，尤其是滬綜指午後一度倒跌，當大家都心亂如麻，臨近尾市竟然華麗轉身抽穿三千點收市，升156點，真係威水。恒指近尾市仲抽穿早市高位，藍籌股得蒙牛（02319）跌，唔通真係見底？

A股精要

平心而論，今次人行出到雙降，但A股都仲係一潭死水，點知隔晚美股急抽，中港兩地即刻有運行，市場情緒查實較受甚麼因素影響顯而易見，故後市仲係要小心行事。

板塊方面，早前講過軍工股隨時借勢翻炒，點知真係開口中，中國飛機租賃（01848）同航天控股（00031）分別抽高17%同12%。

另外，比亞迪（01211）受惠上半年業績表現理想，股價亦大升9.6%，並帶動整個板塊上揚，北汽（01958）、和諧汽車（03836）及吉汽（00175）都升7至12%不等。但要留意，由於內地汽車業競爭激烈，汽車股短炒可以，長揸就真係要諗諗。

保七要靠基建

至於昨日另外一個強勢板塊就係鐵路基建股，無他，國家隊救市有心無力，未來靠大搞基建保七幾可肯定，加上一帶一路，故昨日尾市見中車（01766）、中鐵（00390）、中鐵建（01186）及中交建（01800）都愈升愈有，不過以走勢及AH差價計，就以中鐵最啱博反彈。

中鐵股價近期在6.4元守得幾穩，加上昨日股價重上250日線，9日RSI彈到49.5貼近中軸，MACD短期更有機會轉牛，走勢回暖。以昨日收市價計，中鐵H股較A股平約四成，為上述四隻股AH差價之冠，都算另一個point，如果股價上番八月高位8.4元，都有成1蚊執。