昨日開市見魚缸中人個個眼定定，以為已經夠慘？未算，午後港股最多跌逾千二點，全日主板成交仲增至1,389億元，而且歐洲開市德法英全部裂口低開2至3%，手上揸好倉又未跳船者，真係有得震無得瞓。

事實上，筆者早前都以為今次心理影響大於一切，但近日所見，除環球股市齊齊隊外，就連金價及日圓等避險勝地都加入戰線，可見各類投資市場是「一致行動」，未來影響力非同小可！

昨日即月期指一開市已見21,690點，之後反覆向下，午後跌幅一度收窄，但不久即重現弱勢，期指日市以接近低位收，報21,128點，跌1,360點，低水124點，臨近期指結算但未平倉合約達9.8萬張，反映淡友信心十足。

策略上，保守者可繼續候反彈建淡倉；至於進取如筆者當然不甘坐定定，昨日早市見淡友如此「勇」，決定在21,500點小注追沽，博環球投資市場今次玩鋪大，目標直取兩萬點，最多升穿昨日高位21,800點水平走人。