上周五公布的中國八月製造業PMI初值降至47.1,創近六年半新低,全球正密切注視內地經濟下行風險,美股連日急挫,道指周五晚急插逾500點,環球股市風聲鶴唳。

由外圍情況看來,今日滬綜指頗大機會下試「708」及「709」兩個低位3,421及3,373點。不過,如今A股場內對手已走得七七八八,國家隊逢尾市入場Mark番高個收市指數,實際上只是自己呃自己,對於提振人心根本沒多大意義,亦只會令股市與實體經濟愈走愈遠。

早前的A股快牛,港股跟唔足;如今A股牛市已死,步入熊市,港股唔單只跟到足,仲跌凸,皆因參與港股的投資者較多元化,且由市場力量主導,能較客觀反映市場看法,跟唔升反映市場對A股快牛有保留,跌凸反映市場對內地經濟前景看法悲觀和對人民幣將繼續走貶的預期。即使人行降準減息,相信亦只係杯水車薪,作用不大!

減息降準未必有用

回說港股,上周跌市表現最硬淨的中資股係三隻中資電訊股,因為業績數據唔差,而且盛傳高層人士變動,重組概念支撐股價。

筆者認為,其實港股在技術上已嚴重超賣,短線失守22,000後即市來個短暫反彈不足為奇,但先決條件之一係等到連呢三隻「強勢」中資股都要跟跌,才具備條件。

理論上,若然內地經濟持續下滑,即使靠財政及貨幣政策都唔能夠起死回生的話,嚟緊最大鑊的,應該係表面上好高息、實際上將要面對信貸危機的一眾內銀股。

事實上,今次中央暴力救市,在金融改革上已行錯了一步,雖則未至於一夜盡毁,但開了倒車卻是事實,要重建市場信心並不容易,中資金融股,包括內銀股的估值都要打個折,再加上人民幣貶值預期,以及百業景氣下滑,信貸需求疲弱,企業違約風險驟增,內銀資產質素惡化,亦必拖累估值,故眼前的內銀股有點像「糖衣毒藥」,唔想以身犯險,最好別多手!