恒指上周五雖然收市跌347點，報22,409點，但即市都略有反彈，而期指日間收報22,488點，跌178點，都仲講緊高水78點，豈料夜期已經進入地獄！夜期跌到落22,050點，跌多438點，即時轉低水360點，成交仲增至夜期時段少見的6,024張，顯示淡友奮力出擊。

最大鑊係，如日市開了好倉未走，今次仲「好戲在後頭」！事關歐股跌到七彩，美股上周五晚三大指數均跌逾3%，按ADR計其實恒指已經跌穿22,000點，睇怕今日開市跌就一定，只係唔知跌幾多就真。

近排中港股市大跌，然後環球再現大跌市，加埋南北韓局勢緊張，種種因素都不利資金入場，這從久未反彈的金價上周連彈幾日到1,160美元可見一斑。既然環球風高浪急，若見今日期指低開唔多，或者反彈到22,400至22,500點左右，反而可以四分一資金試沽，博跟環球跌市走一轉，最多抽穿22,600點止蝕。