大埔白石角創新路住宅地將會喺今個禮拜五截標，呢個發展區喺舊年初經歷流標後，其後3次批出嘅同區地皮，地價已經一幅貴過一幅。劉Sir有測量師老友就咁睇，近排本港整體地價明顯攀升，市場已經唔可以同日而語，估計即將截標嘅白石角地皮每方呎樓面地價有條件去到約4,900元，比起今年三月批出嘅毗鄰地皮高咗足足約26.8%，計番估值約莫32.51億元。

大埔白石角創新路住宅地最高估值逾三十二億元。（資料圖片）

張翹楚預期，白石角地皮的競投反應將不俗。（資料圖片）

呢幅白石角創新路住宅地，佔地大約18.4萬方呎，將會提供約超過66.3萬方呎樓面，亦係自去年以來第4幅推出嘅同區住宅地。劉Sir知道，舊年三月同區嘅科進路地皮，因為投標財團嘅出價未達底價而流標收場，不過，其後呢區嘅地價已經由谷底反彈。

好似科研路地皮先於舊年五月以每方呎樓面地價約3,300元嘅同區低位批出，之後翻叮嘅科進路地皮，同埋科進路與博研路交界住宅地，亦喺去年十一月同今年三月，分別以每方呎樓面地價約3,552元同3,864元批出，顯然區內地價已形成升勢。

社區成熟 新地信置勢爭

高緯環球張翹楚就話，最近有多幅土地以高價批出，認為依家嘅市場，同早前已經唔同晒，雖然呢幅創新路地皮位置唔係沿海，但係呢區發展已經開始成熟，亦有唔少發展商已經喺區內投得項目，相信地皮會有唔錯嘅競投反應。

佢估計，呢幅白石角地皮每方呎樓面地價可達約4,900元。如果對比番三月批出嘅科進路與博研路交界住宅地，地價足足高出約莫26.8%，劉Sir知道，地皮嘅市場估值介乎約25.21億至32.51億元，相信新地（00016）同埋信置（00083）呢啲已經喺區內投得地皮嘅發展商，都幾有機會入標競投。

康城八期本周截意向

另外，將軍澳再有大型供應，港鐵（00066）將軍澳日出康城第八期亦喺本周三截收發展意向書，項目提供最多1,430個單位，市場預計每方呎補價約2,600至2,700元，補地價金額最高約28.19億元。