全球金融市場岌岌可危,本港二手樓市繼續陷冰封狀態。綜合代理數據,昨日大型屋苑睇樓量錄明顯跌幅,成交則集中新界區。其中,沙田第一城及天水圍嘉湖山莊均錄減價成交。北角健威花園及深井海韻花園更驚現買家憂股災禍及樓市而「縮沙」的個案。

長沙灣喜薈及喜漾昨重售餘貨單位,並極速沽清。

昨日睇樓量有明顯跌幅的大型屋苑,包括柴灣杏花邨、小西灣藍灣半島、鴨脷洲海怡半島、紅磡黃埔花園、九龍灣淘大花園、藍田麗港城、荃灣愉景新城及海濱花園等。

第一城減價20萬走貨

其中以新界區業主表現最驚青,中原馬斯力表示,嘉湖山莊麗湖居2座低層戶,業主放盤只有數天,見股市波動,昨日減價以345.8萬元售出單位,低市價8%。

沙田第一城昨日亦錄得減價成交,美聯黃錦瀚指,屋苑21座低層戶,業主原先企硬580萬放售單位,但近日見環球大冧市,最終減價20萬,以560萬元易手。

另外,粉嶺碧湖花園更重現跌穿4球放盤,中原陳永強表示,單位為3座中層戶,原先叫410萬元,業主擔心股市波動影響樓市,近日降價近5%至390萬元求甩貨。

此外,深井海韻花園更現「縮沙」個案,晉誠地產李德鴻指,屋苑4座一個中層海景戶,原叫價530萬元,業主被環球股災嚇驚,減價30萬元求售,雖然即時吸引荃灣家庭客打算購入,但昨日簽約前臨時「轉軚」,有待觀望本周外圍局勢後才作決定。

港島方面,世紀21日昇黃文龍表示,受美股昨日爆股災拖累,北角區二手市況即時轉靜,有一成預約睇樓臨時取消,區內指標屋苑更未聞成交,當中健威花園一個C座高層兩房戶,原先獲一上車客「傾掂數」以668萬元購入,惟昨日受環球股災的氣氛嚇窒,跟業主簽約前突然「甩底」取消交易。

喜薈喜漾餘貨照搶清

環球大冧市,但新盤買家仍照撲入市。其中房協長沙灣喜薈及喜漾昨日重售9個餘貨單位,即使售價有所調升,仍吸引幾十位買家到場爭搶,最終不足一句鐘內極速沽清。

另外,遠展(00035)慈雲山鑽嶺,昨日首個周末開放示範單位予公眾參觀,售樓處外出現排隊睇樓人龍,場面熱鬧。

此外,據一手銷售資訊網資料,紅磡維港.星岸錄1伙交易未有進展個案。